कोरोनाको भयका कारण राधाकृष्ण रथयात्रा गाडीमा गराईयो (फोटोसहित)

0SHARES

२८ श्रावण २०७७ नेपाल टाईम्स

२८ साउन, विराटनगर । बाजागाजा, झाँकी, नृत्य, भजनमण्डलीसहित विराटनगरमा हरेक वर्ष श्रीकृष्ण जन्माष्टमीको भोलिपल्ट अर्थात आजैका दिन भगवान राधाकृष्णको रथारोहण हुँदै आएको थियो ।

दक्षिण एसियाकै दोस्रो ठूलो रथयात्राका रुपमा मानिएको विराटनगरको ऐतिहासिक रथयात्राको अवलोकन र श्रीकृष्ण भगवानको दर्शन गर्न हरेक वर्ष विराटनगरका सडकमा लाखौं भक्तजनहरुको घुँइचो देखिन्थ्यो ।

प्रत्येक वर्ष नेपालसंगै भारत, बंगलादेशबाट समेत झण्डै पाँच लाख दर्शनार्थीहरु रथयात्रामा सहभागि भएर एकैसाथ विराटनगरको सडकमा देखिनु त्यो पनि नगण्य घट्नाबाहेक विराटनगरबासीको लागि गौरव र पहिचानको विषय बनेको छ । तर विराटनगरको यस भब्य ऐतिहासिक, दक्षिण एसियाकै दोस्रो ठूलो मानिएको रथयात्रा यस वर्ष भने विधी पूरा गर्दै औपचारिकतामा मात्रै सिमित भएको छ।

विराटनगर महानगरपालिकाका मेयर भीम पराजुली, रथयात्रा आयोजक समितिका अध्यक्ष बाबुराजा ओझा लगायत समिति पदाधिकारीको सहभागितामा रथयात्रालाई औपचारिकता दिईएको छ।

भगवान राधाकृष्णलाई गाडीमा हालेर नगर परिक्रमा गराईएको छ। तीनपैनी स्थित मन्दिर परिसरबाट निकालिएको रथ गाडीमा गोल्छाचौक, महेन्द्र चोक, मुनालपथ, बरगाछी हुदै पुन मन्दिर परिसर पुगेको थियो । कोरोना भाइरसको संक्रमण र यसको जोखिमका कारण विधि पूरा गर्दे जनसागर सहभागि हुने रथयात्रा केही ब्यक्तिमा सिमित गरिएको हो ।

प्रत्येक वर्ष आजको दिन जनसागर उत्रिने विराटनगरका सडकहरु आज सुनसानप्रायः देखिएका छन । त्यसमाथि तिव्रगतिमा समुदायस्तरमा फैलिएको कोरोना संक्रमण रोकथामका लागि लगाइएको लकडाउन र केही स्थानहरु शील गरिएकाले पनि विराटनगर सुनसान देखिएको छ ।

हरेक वर्ष उल्लासमय कृष्णजन्माष्टमी तथा रथयात्रा मनाउँदै आएका विराटनगरका भक्तजनहरुले यस वर्ष भने मन्दिरमा सामाजिक दुरी कायम गर्दै तथा घर, घरमै राधाकृष्णको आराधाना गरी मनाएका छन् ।

कोरोनाको संक्रमण बढ्दै गएपछि र रथयात्रा निकाल्दा बढि भिडभाड तथा संक्रमण फैलिन सक्ने जोखिमका कारण यस वर्षको रथयात्रा ननिकाल्ने निर्णय गरेको विराटनगर तीनपैनीस्थीत श्री राधाकृष्ण मन्दिर समितिले यस अघिनै जनाइसकेको छ ।

द्धापर युगमा पिता वासुदेव र माता देवकीको कोखबाट भाद्र कृष्ण अष्टमीको दिन भगवान श्री कृष्णको जन्म भएको थियो । त्यसैले सो दिनलाई श्रीकृष्ण जन्माष्टमी र रातलाई मोहरात्री भन्ने गरिन्छ ।

यसवर्ष कोरोनाको कहरमा संसारभरका हिन्दु धर्मावलम्बी र भगवान श्री कृष्णका भक्तहरुले जन्माष्टमी भीडभाड नगरी मनाएका छन् ।

त्यसैगरी नेपालका विभिन्न स्थानमा रहेका राधाकृष्ण मन्दिरबाट जन्माष्टमीको भोलीपल्ट निकालिने रथयात्रा पनि स्थगित गरिएको छ । विराटनगरको राधाकृष्ण रथयात्रा वि.स. १९८८ मा खटयात्राबाट सुरु भएर ०२४ सालदेखि रथयात्रामा परिणत भएको हो । ८ जनाले थालेको खटयात्रा अहिले रथ यात्रामा परिणत हुँदा प्रत्येक वर्ष ५ लाख र सोही हाराहारीमा भक्तजन सहभागी हुदै आएका थिए ।

यसदिन राधाकृष्णको दर्शन तथा रथको डोरी छुँदामात्र पनि पाप नास हुने जनविश्वासका कारण पनि रथयात्रामा भक्तजनहरुको घुँइचो लाग्ने गरेको थियो ।

विज्ञापन बक्स