१६ भदौ, चितवन ।
चितवनको भरतपुर अस्पतालमा सोमबार मृत्यु भएका थप तीन जनामा कोरोना भाइरस संक्रमण पुष्टि भएको छ ।
मृत्यु हुनेमा भरतपुर महानगरपालिका–११ का ६५ वर्षीय पुरूष, भरतपुर महानगरपालिका–११ की १८ वर्षीया युवती र पूर्वी चितवनको खैरहनी नगरपालिका–१३ की ५५ वर्षीया महिला रहेको अस्पतालले जनाएको छ । उनीहरूको अस्पतालमा केही घण्टाको फरकमा मृत्यु भएको थियो ।
उनीहरूमा ज्वरो र श्वासप्रश्वासमा समस्या देखिएको थियो । दुई दिन अघिसम्म उनीहरूमा स्वास्थ्य सम्बन्धी खासै समस्या नभएको आपन्तले बताएका छन् ।
एक जनाको मृत्यु नहुँदै र दुई जनाको मृत्यु भइसकेपछि नमूना संकलन गरिएको अस्पतालका सूचना अधिकारी लिलाधर पौडेलले जानकारी दिए ।
भरतपुर अस्पताल कोभिड–१९ परीक्षण प्रयोगशालामा राति गरिएको परीक्षणमा उनीहरुको कोरोना रिपोर्ट पोजिटिभ आएको हो । योसँगै चितवनमा मृत्यु हुनेको संख्या १६ पुगेको छ ।
