टि २० क्रिकेटः आयरल्यान्ड १४५ रनमा सिमित

२२ आश्विन २०७६

२२ असोज, विराटनगर ।
ओमानमा जारी पाँच देश सम्मिलित टीट्वेन्टी अन्तर्राष्ट्रिय क्रिकेट शृंखलाअन्तर्गत आयरल्यान्डले नेपाललाई १ सय ४६ रनको लक्ष्य दिएको छ।

टस जितेर पहिला ब्याटिङ गरेको आयरल्यान्डले २० ओभरमा ८ विकेट गुमाएर १ सय ४५ रन जोड्यो। ९५ रनमा केवल एक विकेट गुमाएको आयरल्यान्ड त्यसपछि लगातार धरासायी बन्न पुग्यो।

आयरल्यान्डका ओपनर पल स्टर्लिङले ५९ र एन्डी बालबिर्नेले ३८ रन बनाए। त्यस्तै स्टुवार्ट थम्पसनले २१ रन जोड्नुबाहेक अन्य दोहोरो अंकमा रन जोड्न सकेनन्।

नेपालका सन्दीप लामिछाने र अविनास बोहोराले दुई दुई विकेट लिए। करन केसी र ललित राजबंशीको नाममा समान एक विकेट रह्यो। आयरल्यान्ड्सले सात रन जोड्दा आक्रामक ब्याट्सम्यान केभिन ओब्रायनलाई गुमाएको थियो।

खेलको दोस्रो ओभरको चौथो बलमा सन्दीप लामिछानेले ओब्रायनलाई क्याच आउट गराएका थिए। त्यसपछि स्टर्लिङ र बालबिर्नेबीच दोस्रो विकेटका लागि ८७ रनको साझेदारी भयो।

आयरल्यान्डले ११ ओभर २ बलमा केवल एक विकेट गुमाएर ९५ रन जोडेको थियो। दोस्रो विकेटका रुपमा बालिबिर्नीलाई ललितले आउट गरेपछि आईरिस टोली एकाएक दबाबमा आएको थियो।

अन्तिम ओभरमा आयरल्यान्डले करन केसीलाई २ छक्कासहित १८ रन लिएको थियो। सन्दीपले चार ओभरमा २१ रन दिए। ललितले चार ओभरमा २३ रन दिए।

अविनासले चार ओभरमा २२ रन खर्चिए। ४७ बलमा दुई छक्का र ६ चौका हिर्काएका स्टर्लिङलाई करन केसीले आउट गरेका थिए। करन र दीपेन्द्र सिंह ऐरीले एक एक रनआउट समेत गराए।

तालिकामा ओमान २ खेलबाट चार अंक जोडेर शीर्षस्थानमा छ। आयरल्यान्डको ३ खेल र नेपालको दुई खेलबाट पनि समान ४ अंक छ।

Facebook Comments

विज्ञापन बक्स