देउवाले पार्टीभित्र अप्रजातान्त्रिक कदम चलाएः प्रकाशमान सिंह

0SHARES

२४ कार्तिक २०७७ नेपाल टाईम्स

२४ कार्तिक, काठमाडौं ।
नेपाली काँग्रेसका नेता प्रकाशमान सिंहले पार्टी सभापति शेरबहादुर देउवाले पार्टीभित्र अप्रजातान्त्रिक कदम चलाएको आरोप लगाएका छन्।

सोमबार बिहान गणेशमान सिंहको १०६ औं जन्मजयन्तीको अवसरमा शोभाभगवतीमा पुगेर यस्तो बताएका हुन्। गणेशमानको शालिकमा माल्यार्णपछि नेता सिंहले महाधिवेशन सकिएको दुई महिनामा गठन गरिसक्नुपर्ने विभागहरु अर्को महाधिवेशनको मुखमा गठन गरेर देउवाले अप्रजातान्त्रिक कदम चालेको बताएका हुन्।

१३ औं महाधिवेशन सकेको दुई महिनामै विभाग गठन गर्नुपर्नेमा ४ वर्षे कार्यकाल सकेर पनि देउवाले केही नगरी महाधिवेशनको मुखमा यस्तो कदम चालेको उनले बताए। पटकपटक कार्यतालिका फेरेर पनि गम्भीरता पार्टीको नेतृत्वमा नेदेखेको प्रकाशमानको आरोप थियो।

१४ औं महाधिवेशनको तिथिमिति तोकिसकेपछि महाधिवेशन निष्पक्ष होस् भन्ने आम वर्करको चाहना छ। प्रजातान्त्रिक पार्टीभित्र अप्रजातान्त्रिक कदम भइरहेको छ। यसविरुद्ध २७ जना केन्द्रीय सदस्यले १६ बुँदे विरोध प्रस्ताव बुझाएकै हो, उनले भने, विभागहरु खारेज हुनुपर्ने माग हामीले त्यसमा राखेका छौं।

यो कुनै भागबण्डाको राजनीति नभएको उल्लेख गर्दै उनले विधिसम्मत पार्टी चल्नुपर्ने सिंहको भनाई थियो। यसैमा आफूहरु लागिरहेको उनले बताए। राजनीति गर्ने मान्छेले जनताको विश्वास जित्नुपर्ने कुरा गणेशमानबाट सिक्नुपर्ने प्रकाशमानको भनाई थियो।

काँग्रेसमा अहिले महाधिवेशनको मितिबारेको किचलो र विभाग गठनको किचलो कायमै रहेको छ। किचलो समाधानका लागि देउवा र वरिष्ठ नेता रामचन्द्र पौडेल पक्ष पटकपटक पदाधिकारी बैठकमा छलफलसमेत भएका छन्।

यद्यपि कुनै निष्कर्ष भने निस्केको छैन। यसैबीच यी विषयमा छलफल गर्न आज बस्ने भनिएको काँग्रेसको केन्द्रीय समिति फेरि सरेको छ। २४ गतेका लागि बोलाइएको बैठक २७ गतेका लागि सारिएको हो।

यसअघि कात्तिक २१ गते बोलाइएको बैठक प्रतिनिधिसभा सदस्य सूर्यबहादुर केसीको निधनका कारण स्थगित गरिएको थियो। देउवाले पौडेललगायत अन्य पक्षको सहमति बिनै बहुमतको बलमा आफ्ना पक्षका नेताहरुमात्र राखेर विभिन्न विभागहरु गठन गरिसकेका छन्।

पछिल्ला पदाधिकारी बैठकमा देउवाले विभाग गठनबारे आफू छलफल गर्न तयार नरहेको अडान कायम राख्दै आएका छन्। यता काँग्रेसको १४ औं महाधिवेशनका लागि तोकिएको म्याद पनि गुज्रिन थालेको छ।

विज्ञापन बक्स