नियन्त्रणमुखी नभई सञ्चारमैत्री नीति ल्याउनुपर्ने

0SHARES

२३ असार २०७५ नेपाल टाईम्स

विराटनगर, असार २३

नियन्त्रणमुखी नभई सञ्चारमैत्री नीति ल्याउन यहाँका सञ्चारकर्मीले प्रदेश सरकारसंग आग्रह गरेका छन्। नेपाल पत्रकार महासंघ मोरङद्वारा आज यहाँ आयोजित “सञ्चार नीति र कानून” विषयक एकदिने गोष्ठीमा उनीहरुले नयाँ सञ्चार नीति र सञ्चार कानून निर्माण हुने क्रममा रहेकाले यसप्रति प्रेस जगत चनाखो हुनुपर्ने आवश्यकतामाथि जोड दिए ।

नेपाल पत्रकार महासंघका केन्द्रीय सदस्य उद्धव तिम्सिनाले सञ्चार क्षेत्रलाई नियन्त्रण गर्ने गरी प्रदेश सरकारले विधेयक ल्याउन लागेकाले सो विरुद्ध सशक्त आवाज उठाउनुपर्ने बताउँदै सञ्चार क्षेत्रलाई नियन्त्रण गर्न खोजिए त्यसप्रति सचेत रहन सबैमा आग्रह गरे ।

महासंघ प्रदेश नं १ का महासचिव विवेक गौतमले प्रेसलाई संकूचित पार्ने गरी प्रदेश सरकारले कानून बनाउन लागेको बताउँदै यसप्रति सबैले चनाखो हुनुपर्नेमा जोड दिए । वरिष्ठ पत्रकार यज्ञ शर्माले सञ्चार क्षेत्र र सामाजिक सञ्जालप्रति राजनीतिक पक्षको दृष्टिकोण नकारात्मक रहेकाले कठोर कानून बन्नसक्ने सम्भावना रहेको छ भने ।

महासंघका जिल्ला अध्यक्ष बन्धु पोखरेलको अध्यक्षतामा सम्पन्न उक्त गोष्ठीमा प्रेस चौतारी नेपालका जिल्ला अध्यक्ष रामचन्द्र अधिकारी, नेपाल प्रेस युनियनका जिल्ला अध्यक्ष मीनकुमार नवोदित, पत्रकारद्वय गणेश लम्साल र धु्रव भट्टराईले नयाँ सञ्चार नीतिको विरुद्धमा पत्रकारलाई एकजुट हुन आग्रह गरे ।
रासस

विज्ञापन बक्स