न्याय नपाएपछि मोरङ प्रहरी कार्यालय अगाडि आफन्तको धर्ना

0SHARES

१३ आश्विन २०७५ नेपाल टाईम्स

विराटनगर,असोज १३

विराटनगरस्थित नोबेल मेडिकल कलेजमा चिकित्सक शौरभ उप्रेतीको मृत्यु प्रकरणमा गहन अनुसन्धान गरी न्याय दिलाउन माग गर्दै परिवार र आफन्तले जिल्ला प्रहरी कार्यालय मोरङ अगाडि धर्ना दिएका छन् ।

साउन १६ गते सुतेकै अवस्थामा बारा कोल्भी नगरपालिका ८ का उप्रेती कोठामै मृत अवस्थामा भेटिएका थिए । आफन्तले आत्महत्या नभएर उनको हत्या भएको दाबी गरेका छन् ।

घटना रहस्यमय बनेको भन्दै थप अनुसन्धान गर्न प्रहरीको ध्यानाकर्षण गरेका छन् । मृतककी बहिनी सोनु उप्रेतीले घटनाको छानबिनमा प्रहरीले गम्भीरता देखाउनु पर्ने बताए ।

आफन्त र प्रणामी युवा परिषदले आज जुलुस र त्यसपछि जिल्ला प्रहरी कार्यालय अगाडि धर्ना दिएका हुन् । मृतकका आफन्त उदय सापकोटाले दुई महिनापछि शुक्रबार मात्रै प्रहरीले उप्रेतीसँगै बस्ने कुबेरसिंह थापा विरुद्ध किटानी जाहेरी लिएको बताए ।

पोस्टमार्टमको रिर्पोटमा समेत ‘स्ट्राङ्गुलेसन मल्टीपल लिगेचर माक्र्स’ देखिएकोले अनुसन्धान हुनुपर्ने उनले बताए । आफन्तले प्रहरीलाई ज्ञापन पत्र समेत बुझाएका छन् ।

यता आरोपित दुई चिकित्सक कुबेरसिंह थापा र अर्का सहपाठी सप्तरीका शत्रुधन साहले घटनामा आफूहरुको कुनै संलग्नता नरहेको बरु उप्रेती परिवारले कुनै ठोस प्रमाणको आधार बिना नै आफूहरुको भविष्य बर्बाद पारिदिने गरी हत्यारा बनाउन खोजेको दाबी गरेका छन् ।

विज्ञापन बक्स