नेपाल टाईम्स 
विराटनगर,असोज ७
प्रदेश नं १ को प्रदेशसभा बैठकले प्रदेश १ को प्रदेश सुशासन प्रत्याभुत गर्ने सम्बन्धमा बनेको विधेयक थप छलफलका लागि न्याय प्रशासन तथा विधायन समितिमा पठाएको छ ।
विधेयमाथि परेका संशोधन प्रस्ताव तथा दाफाउपर दाफवार छलफलका लागि आइतबार समितिमा पठाइएको हो । संसद बैठकमा सामाजिक विकास समितिमा पठाइ छलफल र संशोधनपछि पुनः सदनमा पेश भएको घरेलु हिंसा सम्बन्धीत विधेयकसँग सम्बन्धित प्रतिवेदन प्रस्तुत गरियो ।
समितिका अध्यक्ष अगमलाल चौधरीले सदनमा प्रतिवेदन पेश गरे । सामाजिक विकास मन्त्रीको जीवन घिमिरेका तर्फबाट सदनमा यसअघि प्रस्तुत भएको विधेयक समितिमा पठाइएको थियो ।
शुन्य समयमा बोल्दै सांसद विजयकुमार विश्वासले घिनाहाघाट विराटचौक सडक मर्मत, बाढीले बगाएको सुनसरी मोरङ सिंचाई आयोजनाको नहर निर्माण र विराटनगर आयल निगम अगाडि तेल ट्यांकर व्यवस्थापनबारे प्रदेश सरकारको ध्यानाकर्षण गराए ।
बैठकमा मोहम्मद ताहिर मियाँले सुनसरीमा खुर्सिद मियाको हत्याको छानबिन गर्न माग गरे। यस्तै सांसद बसन्तीदेवी यादवले विकास निर्माणमा गतिहीनताको अन्त्य हुनुपर्ने बताइन्।
