जनकपुर, फागुन ११
फोहर फाल्ने उचित ठाउँको अभाव, नगर क्षेत्रभित्रै जताततै फोहरको थुप्रो, खुला नाला, हिलाम्य बाटो लगायतले आजभोलि ऐतिहासिक शहर जनकपुरको पहिचान र प्रतिष्ठा गुम्दै गइरहेको छ ।
उपमहानगरपालिका घोषणा भएको झन्डै एक वर्ष भन्दा बढि भई सक्दा समेत उचित ‘डम्पिङ साइट’को अभावमा सडक पेटीमै फोहर फ्याँक्न जनकपुर उपमहानगरपालिकावासी बाध्य रहेका छन ।
जनकपुर उपमहानगरपालिकाभित्र दैनिक २५ टन फोहर निस्कने गरेको छ । त्यसको विसर्जन भने ऐतिहासिक बेला नदी किनार, जिरोमाइल, मुजेलिया, पिराडीको सडक छेउमै गर्नाले मानव स्वास्थ्यमा प्रतिकूल असर पर्ने गरेको छ ।
त्यस्तै, जनकपुरको मुटु मानिने शिव चोकमा पालिने फोहरका कारण त्यहाँका व्यापारीलगायत बटुवा नाक थुनेर हिँड्नुपर्ने स्थिति रहेको स्थानीय दीपक ठाकुर बताउँछन् । रोकारवाला निकायले ध्यान नदिएको कारणले गर्दा समेत जनकपुर नगर अहिले दुर्गन्धित बनेको छ।
