काठमाडौं, फागुन ११
नेकपा माओवादी केन्द्रका अध्यक्ष पुष्पकमल दाहालले बामपन्थी गठबन्धनको नेतृत्वमा दुई तिहाई बहुमतसहितको सरकार बन्ने दावी गरेका छन् ।
अध्यक्ष दाहालले उपेन्द्र यादव नेतृत्वको संघीय समाजवादी फोरम, नेपाल पनि सरकारमा आउने र नयाँ सरकार २ तिहाई बहुमतसहितको हुने प्रष्टयाएका हुन् । उनले एमालेसँगको पार्टी एकता गर्ने निर्णय शसस्त्र द्वन्द्व सुरु गर्नुभन्दा पनि ठूलो उपलब्धि भएको दावी समेत गरे ।
आज काठमाडौंमा आयोजित एक कार्यक्रममा बोल्दै अध्यक्ष दाहालले दुई पार्टीबीचको एकताबाट आम जनतामा खुसीयाली छाएको उनको तर्क थियो ।
उनले बामपन्थी एकताबाट दक्षिणपन्थी शक्तिहरु आतंकित भएको भन्दै सचेत रहन पार्टीका नेता, कार्यकर्तालाई निर्देशन दिए । अध्यक्ष दाहालले पहिलो पटक नेपालमा बामपन्थीको नेतृत्वमा दुई तिहाई बहुमत सहितको सरकार बन्न लागेको उल्लेख गर्दै त्यसको रक्षा गर्न सबै लाग्नु पर्ने बताए ।
कार्यक्रममा नयाँ शक्ति पार्टी, नेपालका केन्द्रिय सचिवालय सदस्य जनक शाहलाई अध्यक्ष दाहालले पार्टी प्रवेश गराएका थिए । शाह डा. बाबुराम भट्टराई अर्थमन्त्री हुँदा बजेट निर्माण कार्यदलमा थिए । उनले प्रदेशसभा चुनावमा बामगठबन्धनकी उम्मेदवार गरिमा साहलाई सहयोग गर्ने औपचारिक घोषणा नै गरेका थिए ।
