एजेन्सी, १९ असोज
फूटबल जगतकै एक दिग्गज खेलाडीका रुपमा चिनिएका पोर्चुगलका क्रिस्टियानो रोनाल्डोलाई पोर्चुगल राष्ट्रिय फुटबल संघले राष्ट्रिय टोलिबाट बाहिर राखेका छन् । यही सिजन इटालियन क्लब युभेन्टसमा आबद्ध भएका रोनाल्डोलाई एक अमेरिकन युवतीमाथि बलात्कारको आरोप लागेको छ ।
अक्टुबर १ देखि सुरु हुने नेसन्स लिगमा उनलाई समाबेस गरिएको छैन । पोर्चुगलका लागि १ सय ५४ खेल खेल्दै ८५ गोल गरिसकेका उनलाई आफ्नो व्यक्तिगत समस्यालाई समाधान गर्न समय दिनुपर्ने पोर्चुगलका तत्कालिन प्रशिक्षक फर्नान्डो सान्तोस र पोर्चुगिज खेलुकुद संघका प्रमुख गोमेजले बताएका छन् ।
क्याथरिन मायोर्गा नाम गरेकी युवतीले २००९मा रोनाल्डोले आफुलाई बलात्कार गरेको आरोपमा मुद्दा हालेकी हुन् । लास वेगासका प्रहरी प्रमुखले यो एउटा जटिल केस भएको भन्दै फेरी उक्त केसलाई खुलाएका छन् ।
स्मरण रहोस, रोनाल्डो यही सिजन रियल मड्रिड क्लबबाट ८ करोड ८३ लाख पाउण्डमा युभेन्टस गएका हुन् । रोनाल्डो युरोपियन देशबाट आफ्नो देशका लागि सबैभन्दा धेरै गोल गर्ने एक्लो खेलाडीसमेत हुन् ।
