विराटनगर, १७ असोज
जिल्ला प्रहरी कार्यालय मोरङले चाडपर्व लक्षित बिशेष सुरक्षा योजना ल्याएको छ । नजिकिएको चाडपर्वमा हुनसक्ने आपराधिक घटना न्युनिकरणगर्न भन्दै मोरङ प्रहरीले बिशेष सुरक्षा योजना ल्याएको हो ।
सुरक्षा योजना अन्र्तगत चाडपर्वको वेला धेरै भीडभाड हुने स्थानमा सादा पोशाक प्रहरी खटाउनुका साथै पैदल र साईकल प्रहरी गस्तीको व्यवस्था गरिएको जनाइएको छ । यस्तै वित्तीय संस्थाहरुमा सादा पोशाकमा हतियारसहितको प्रहरीको व्यवस्था गरिएको जिल्ला प्रहरी कार्यालय मोरङका प्रमुख मनोजकुमार केसीले बताए । सुरक्षा योजना अन्र्तगत मुख्य सडकमार्ग तथा सहायक मार्गमा सवारी चेकजाँचको विशेष व्यवस्था गरिने छ । केसीले चाडपर्वका वेला सीमा क्षेत्रवाट हुने हातहतियार ओसारपसार नियन्त्रण,अवैध पैठारी नियन्त्रण, लागूपदार्थ ओसारपसार नियन्त्रणमा सर्तकता,समाजमा शान्ति सुरक्षा भङग गर्नेलाई नियन्त्रण आदि कार्यमा विशेष सर्तकता अपनाइने बताए । सुरक्षा योजनामा जिल्लालाई ९ क्षेत्रमा विभाजन गरी झण्डै एकहजार प्रहरी परिचालन गरिने केसीले जानकारी दिए ।
यसैबीच सवारी दुर्घटनालाई नियन्त्रण गर्न मोरङ प्रहरीले नयाँ नियम लागू गर्ने भएको छ । प्रहरीले यही असोज २३ गतेदेखि मापसे कारबाहीमा नयाँ नियम लागू गर्ने जनाएकोछ । मापसे गर्ने चालकले अब परीक्षा दिनुपर्नेछ । परीक्षामा ८० प्रतिशत सही उत्तर दिए मात्र थप कारवाही प्रकृया अघि बढने छ । परीक्षा जिल्ला प्रहरी कार्यालयमा उपस्थित भएर वा अनलाइनबाट पनि दिन सकिन्छ । मोरङ प्रहरी प्रमुख केसीका अनुसार असोज २३ गतेदेखि जिल्ला प्रहरी कार्यालयमा प्रत्येक दिन ९ बजे परीक्षा सञ्चालन गरिने छ । परक्षिमा ८० प्रतिशत सही उत्तर दिलेलाई मात्र कारवाही प्रकृया अघि बढाइनेछ । यसअघि मापसे गर्ने सवारी चालकलाई जरिवाना तिराएर सचेतना कक्षा लिँदै छाड्ने गरिएको थियो ।
अब भने मोरङ प्रहरीले कारवाही गर्न पनि परीक्षा लिने भएको हो । परीक्षामा ट्राफिक नियम, मापसे गर्दा हुने कारवाही लगायतका विषयमा ८० वटा प्रश्न सोधिनेछ । परीक्षामा विशिष्ट श्रेणी अर्थात ८० प्रतिशत उत्तर मिलाउनेलाई मात्र जरिवाना तिराएर लाइसेन्स दिइनेछ ।
