यातना दिने शिक्षिकाको रिहाइका लागि अभिभावकहरूकै दबाब

२७ फाल्गुन २०७६

२७ फागुन, काठमाडौँ । जडीबुटीस्थित जागृति एकेडेमीमा अध्ययनरत विद्यार्थीलाई यातना दिने शिक्षिका सीतालक्ष्मी कर्माचार्यलाई रिहा गरिदिन अभिभावकहरूले नै दबाब दिएका छन् ।

महानगरीय प्रहरी वृत्त बानेश्वरको हिरासतमा रहेकी सामाजिक विषयकी शिक्षिका कर्माचार्यलाई रिहाइ गर्न अभिभावकहरूले दबाब दिएका हुन्न् । परीक्षामा कम नम्बर ल्याएको भन्दै कर्माचार्यले विद्यालयमा कक्षा ६ का २७ र ७ का ९ जना विद्यार्थीलाई बिहीबार ब्लेडले नाडी चिर्न लगाएकी थिइन् ।

त्यसको भोलिपल्ट शुक्रबार अभिभावकहरू उजुरी गर्न विद्यालय पुगेका थिए । फागुन २३ गते विद्यार्थीलाई ब्लेडले चिर्न लगाउने शिक्षिका कर्माचार्यलाई विद्यालय व्यवस्थापन समितिको निर्णयअनुसार बर्खास्त गरिएको थियो । शनिबार प्रहरीले कर्माचार्यलाई नियन्त्रणमा लिएर अनुसन्धान गरिरहेको छ ।

शनिबार पक्राउ परेकी शिक्षिका कर्माचार्य आइतबार र सोमबार पनि सार्वजनिक बिदा भएका कारण अदालतबाट म्याद लिएर उनको अनुसन्धान हुन सकेको छैन । मंगलबार उनलाई अदालतमा उपस्थित गराइने प्रहरीले जानकारी दिएको छ । अनुसन्धानकै क्रममा प्रहरीले यातना भोगेका विद्यार्थीका अभिभावक र एकेडेमीका प्रिन्सिपल राजनकुमार श्रेष्ठलाई वृत्तमा बोलाएर घटनाबारे जानकारी लिएको थियो ।

वृत्तका डीएसपी दुर्गाराज रेग्मीले प्रहरी हिरासतमा रहेकी शिक्षिकालाई रिहाइ गर्न प्रिन्सिपल र अभिभावकबाटै दबाब आएको बताए ।
शिक्षिकाविरुद्ध विद्यालय र अभिभावकका तर्फबाट जाहेरी नपरे पनि ‘बालबालिकासम्बन्धी ऐन–२०७५’ अनुसार मुद्दा दायर गरिने उनले बताए । सो ऐनको परिच्छेद ८ को दफा ६६ मा बालबालिकालाई विद्यालयमा कुनै किसिमको यातना, धम्की वा त्रास दिन नपाइने उल्लेख छ ।

विज्ञापन बक्स