रशिद खान चम्किएपछि अफगानस्तानको शानदार जित

0SHARES

५ आश्विन २०७५ नेपाल टाईम्स

एजेन्सी, असोज ५
एसिया कप अन्तर्गत समुह चरणको अन्तिम लिग खेलमा अफगानस्तानले बंगलादेशलाई १ सय ३६ रनले पराजित गरेको छ ।

अफगानिस्तानका युवा स्टार रशिद खान ब्याटिङ र बलिङ दुवै पक्षमा चम्किएपछि अफगानिस्तानले जित आफ्नो पोल्टामा पार्न सफल भएको हो । अफगानिस्तानले प्रस्तुत गरेको २ सय ५६ रनको लक्ष्य पछ्याउने क्रममा बंगलादेश १ सय १९ रनमा समेटियो ।

टस जितेर ब्याटिङ रोजेको अफगानिस्तानले निर्धारित ५० ओभरमा ७ विकेट गुमाउँदै २ सय ५५ रन जोडेको थियो । ४१ औं ओभरमा १६०–७ को स्थितिमा रहेको अफगानिस्तानलाई रशिद र गुल्बदीन नाइबको अविजित साझेदारीले उकासेको थियो ।

उनीहरुले आठौं विकेटका लागि ५५ बलमा अविजित ९५ रन जोडेका थिए । जसमध्ये नाइबले ३८ बलमा ५ चौकाको मदतले नटआउट ४२ रन बनाए भने रशिदले अर्धशतक जोड्ने क्रममा ३२ बलको सामना गर्दै ८ चौका र १ छक्का प्रहार गर्दै ५७ रनमा नटआउट रहे ।

त्यसअघि मध्यक्रमका ब्याट्सम्यान हस्मतुल्लाह शाहिदीले ५८ रन जोड्दै इनिङस सम्हालेका थिए । उनले ९२ बल खेल्दै ३ चौका हने । ओपनर मोहमद सहजादले ४७ बलमा ४ चौकासहित ३७ रनको योगदान दिए । समिउल्लाह शेनावारीले १८ रन र मोहमद नाबीले १० रन जोड्दा कप्तान अश्गर अफगान र इहसानउल्लाहले ८–८ रन जोडे । बंगलादेशका लागि शाकिब अल हसनले ४, अबु हैदरले २ तथा रुबेल होसेनले १ विकेट हात पारेका थिए ।

जवाफी ब्याटिङमा उत्रिएको बंगलादेशले अफगानिस्तानको स्पिन आक्रमणको सामना गर्न सकेन ।बंगलादेशका लागि शकिब अल हसनले ३२, महुमुदुल्लाहले २७ तथा मोसादेक होसैनले नटआउट २६ रन जोड्नुबाहेक अन्य ब्याट्सम्यानले दोहोर अंक छुन सकेनन् ।

महत्त्वपूर्ण खेलाडीलाई विश्राम दिएको खेलमा बंगलादेशको ब्याटिङ निकै फितलो रहयो । अफगानिस्तानका लागि रशिद, मुजिब उर रहमान र नाइबले २–२ विकेट लिए । अफताब आलम, मिहमद नाबी र रहमत शाहले १–१ विकेट हात पारे ।

यस नतिजासँगै एसिया कपको शीर्ष ४ टोलीको टुङ्गो लागेको छ । समूह ‘ए’ बाट भारत र पाकिस्तान शीर्ष ४ मा पुगेका छन् भने अर्को समूहबाट अफगानिस्तान र बंगलादेश अगाडी बढेका छन् । सुपर चार चरणमा सबै टोलीले एक अर्काको सामना गर्नेछन् ।

विज्ञापन बक्स