समसामयिक विषयमा सांसदले गराए सरकारको ध्यानाकर्षण

0SHARES

नेपाल टाईम्स

७ जेष्ठ, काठमाडौँ ।
राष्ट्रियसभा बैठकको शून्य समयमा बोल्ने सांसदहरुले विभिन्न विषयमा सरकारको ध्यानाकर्षण गराएका छन् ।

कोरोना संक्रमितसँगै दिर्घरोगी र अन्य विरामीहरुको उपचार हुन नसकेको, पर्याप्त पूर्वाधार नभएको र विदेशमा अलपत्र परेकालाई नेपाल भित्र्याउनुपर्ने लगायतका विषयमा सांसदहरुले सरकारको ध्यानाकर्षण गराएका हुन् ।

नेपाल कम्युनिष्ट पार्टी (नेकपा) सांसद नन्दा चपाईंले कोरोना संक्रमित विरामी र दिर्घ रोगी तथा गर्भवति महिलाको चेकजाँच एउटै ठाउँमा भइरहेको बताइन । कोरोना संक्रमितको उपचारकालागि फरक र अन्य विरामीहरुका लागि फरक अस्पताल निर्माणमा ध्यानदिन उनले आग्रह गरिन ।

सुविधायुक्त ठाउँमा संक्रमित व्यक्ति र गर्भवति महिलाको उपचार गर्ने अस्पताल फरक भएपनि धेरै प्रदेशहरुमा दुबै प्रयोजनका लागि एउटै अस्पताल रहेको तर्फ उनले सरकारको ध्यानाकर्षण गराइन् ।

उनले भनिन, ‘‘सुविधायुक्त ठाउँमा कोरोनाभाइरस र गर्भवती महिलालाई जाँच गर्ने अस्पताल फरक होला तर सबै प्रदेशमा नभएको कारण अन्य प्रदेशमा पनि अन्य प्रयोजनाका लागि बनाइएको भवनमा उपचार गर्ने व्यवस्था मिलाओस भन्न चाहन्छु ।’’ नेपाली कांग्रेसका सांसद प्रकाश पन्थीले २०२० मा २० लाख पर्यटक भित्र्याउने लक्ष्य राखेको सरकारले विदेशमा संकटमा रहेका नागरिकलाई किन स्वदेश ल्याउन नसकेको भनी प्रश्न गरे ।

८, १० लाख नेपालीहरु विदेशमा तड्पिएका छन् । उनीहरुलाई प्राथमिकताका आधारमा उद्धार गर्न आवश्यक रहेको उल्लेख गर्दै उनले भने, ‘‘जरुरी, जरुरी र सामान्य गरी प्राथमिकताका आधारमा उद्धार गर्न आवश्यक छ । नेपालमा निजी समेत दर्जनौं विमानहरु पनि छन् ।

यसैगरी सुविधा सम्पन्न होटलहरु छन तिनीहरुलाई आइसोलेसन र क्वारेन्टाइन बनाऔं र पूर्व राष्ट्र सेवक कर्मचारीहरुलाई समेत प्रयोग गरौं । सिमानामा अड्केकाहरुलाई बस लगायत निजी क्षेत्रसँगको सहकार्यमा उद्धार गरौं । सरकारले आफ्नो लगानी गर्ने यता तिर हो । यतिकै बस्नु भन्दा हवाई सेवा, होटल र बसहरुले पनि काम पाउँदछन् ।

लकडाउनले यति गर्न रोक्दैन् । समस्यामा परेका जनताले राज्यलाई अभिभावक भएको अनुभुति होस् । हामीले नेपाली भएको गर्व गर्न सकौं ।’’ नेकपा सांसद मायाप्रसाद शर्माले द्वन्दकालिन समयमा जागिर गुमाएका शिक्षहरुलाई उचित क्षतिपूर्तिको व्यवस्था गर्न माग गरे ।

शान्ति प्रकृयासँग जोडिएको विषय भएकाले सरकारले पूर्नवहाली वा क्षतिपूर्तिको लागि बजेट छुट्याउनु पर्ने उनले बताए । उनले भने, ‘‘जनयुद्धका क्रममा शिक्षकहरु तत्कालिन सरकारद्धारा जागिर खोसियो । उनीहरुले आन्दोलन गरिराखेको पनि धेरै वर्ष भएको छ ।

यो शान्तिप्रकृया सँग जोडिएको विषय भएको कारणले सरकारले बजेट छुट्याई तिनिहरुको पुर्नवहाली र क्षतिपूर्तिको उचित व्यवस्था गरोस । ’’

Facebook Comments

विज्ञापन बक्स