१६ कात्तिक, काठमाडौं । कोरोना संक्रमण देखिएका कर्मचारीले हाजिर गर्नु पहिले कोरोना नेगेटिभ आएको रिपोर्ट देखाउन त्रिवि रेक्टर कार्यालयले भनेको हो।
त्रिवि रेक्टर कार्यालय अन्तर्गत अनुसन्धान निर्देशनालयले आइतबार कार्यालय पुगेका कर्मचारीलाई पिसिआर परीक्षणको रिपोर्ट मागेर हाजिर गर्न नदिएको हो।
‘मेरो रिपोर्ट नेगेटिभ आइसकेको हो। रिपोर्ट छ भन्दा पनि अहिले देखाएर मात्रै हाजिर गर्नु भने,’ एक कर्मचारीले गुनासो गरे।
तर कार्यालयले पहिले कोरोना देखिएका कर्मचारीका हकमा मात्रै कोरोना नेगेटिभ आएको रिपोर्ट देखाउन भनेको बताएको छ।
निर्देशनालयका डाइरेक्टर उमेश मण्डलले सेतोपाटीसँग भने, ‘निको भएको हो भने त्यसको रिपोर्ट देखाउनुपर्छ। मोबाइलमा भए पनि रिपोर्ट देखाउनुप¥यो। किनभने हामी सुरक्षित हुनुप¥यो।’
स्वास्थ्य मन्त्रालयले लक्षण नदेखिए १४ दिनपछि कोरोना परीक्षण गराइ राख्नु जरूरी नहुने बताएको छ।
मन्त्रालयका प्रवक्ता डाक्टर जागेश्वर गौतमले सरकारी वा गैरसरकारी कुनै पनि कार्यालयले रिपोर्ट मागेर दुःख दिन नहुने बताए। कसैले उजुरी दिए कारबाही हुने पनि उनको भनाइ छ।
स्वास्थ्य मन्त्रालयले रिपोर्ट देखाउन जरूरी नहुने बताएको सन्दर्भमा निर्देशनालयका डाइरेक्टर मण्डलसँग कुरा राख्दा उनले मन्त्रालयले बनाएको प्रोटोकल आफूहरूलाई थाहा नहुने बताए।
‘स्वास्थ्य मन्त्रालयले के प्रोटोकल बनाएको छ, हामीलाई थाहा भएन। हाम्रो कर्मचारीलाई पहिले कोरोना लागेको थियो र ऊ अहिले निको भएको हो वा होइन भन्ने मात्रै हामीले जान्न खोजेको हो। निको भएको हो भने प्रमाण त होला नि त्यसको आधारमा हाजिर गर्नुस् भनेको हो,’ उनले भने।
