राजस्थान रोयल्सलाई ६ विकेटले हराउँदै कोलकाता नाइट राइडर्स इन्डियन प्रिमियर लिग (आइपिएल) को प्लेअफ नजिक पुगेको छ। १ सय ४३ रनको लक्ष्य पछ्याएको कोलकाताले १२ बल बाँकी रहँदा ४ विकेट गुमाएर १ सय ४५ रन बनाएको थियो ।
मध्यम लक्ष्य पछ्याउने क्रममा कोलकाताका लागि ओपनर क्रिस लेनले टोलीका लागि सर्वाधिक ४५ रनको योगदान गरे। कप्तान दीनेश कार्तिकले अविजित ४१ रन जोड्दा अर्का ओपनर सुनिल नारिन र नितेश रानाले समान २१-२१ रन बनाए। यस्तै आन्द्रे रसेलले अविजित ११ रन जोडेका थिए।
राजस्थानका बेन स्टोक्सले ३ र इश सोदीले १ विकेट लिए।
त्यसअघि टस हारेर पहिले ब्याटिङ गरेको राजस्थानले १९ ओभरमा सबै विकेट गुमाएर १ सय ४२ रन बनाएको थियो ।
उसका लागि राहुल त्रिपाठी र जोस बट्लरले पहिलो विकेटका लागि ६३ साझेदारी गरे पनि त्यसपछिका ब्याट्सम्यानले इनिङ सम्हाल्न सकेनन्।बट्लरले टोलीका लागि सर्वाधिक ३९ रन जाडे भने त्रिपाठीले २७ रन बनाए।
त्यस्तै टोलकिा जयदेव उन्ड्कटले २६ रन थपे । १८ बल खेलेका उनले ३ चौका र १ छक्का प्रहार गरे। कप्तान अजिन्के रहानेले ११, सञ्जु सामसनले १२ र बेन स्टोक्सले ११ रन बनाए ।
कोलकाताका कुलदीप यादवले ४, आन्द्रले रसेल र प्रसिद्ध कृष्णले समान २ तथा शिवम माभी र सुनिल नारिनले समान १ विकेट लिए।
लिग चरणको एक खेल बाँकी रहँदा यो जितसँगै कोलकाताको १४ अंकसहित तेस्रो स्थानमा थप मजबुद भएको छ। चौथो स्थानको राजस्थानको १२ अंक छ। पाँचौं स्थानको किङ्स ११ पञ्जाबको पनि १२ अंक छ।
आइपिएलमा बुधबार मुम्बई इन्डियन्स र किङ्स ११ पञ्जाबबीच प्रतिस्पर्धा हुनेछ।
