विराटनगर,जेठ २ ः आज विहानबाट सम्पर्क विहीन बनेको मकालु एयरको विमान बाजुरामा भेटिएको छ ।
सुर्खेतबाट सिमिकोटका लागि उडको सम्पर्कविहीन विमान केहीबेरअघि बाजुराको बगरमा भेटिएको त्रिभुवन विमानस्थलका महाप्रबन्धक राजकुमार क्षेत्रीले जानकारी दिए ।
कार्गोे सामान लिएर उडेको उक्त विमानमा चालक दलका दुवै सदस्य सकुशल रहेको क्षेत्रीले बताएका छन् । विमानमा दुई जना चालक दलका सदस्य मात्रै थिए ।
‘सम्पर्कविहीन विमानले बाजुराको बगरमा आपतकालीन ल्यान्ड गरेको जानकारी आएको छ’, महाप्रबन्धक क्षेत्रीले भने, ‘विमानमा रहेका चालक दलका दुवै सदस्य सकुशल हुनुहुन्छ ।’
सुर्खेतबाट बुधबार बिहान कार्गो सामान लिएर उडेको विमान सम्पर्कविहीन भएको थियो । सम्पर्कविहीन भएको केही समयपछि विमानले बाजुराको बगरमा आपतकालीन अवतरण गरेको क्षेत्रीले बताए ।
बाजुराका प्रमुख जिल्ला अधिकारी चेतराज बरालले विमान भेटिएको जानकारी आएसँगै त्यसतर्फ प्रहरी टोली पठाइएको जानकारी दिए ।
