२३ कात्तिक, विराटनगर ।
पछिल्लो समय नेपालमा बलात्कारका घटनाहरु बढ्दै गएको र सरकारले यसको नियन्त्रण गर्न सरकारले पहल नगरेको भन्दै विराटनगरमा बलात्कार विरुद्ध प्रदर्शन गरिएको छ । ‘अझै कति सहने ?’ अभियानका अभियान्ताहरुले शनिबार विराटनगरसहित देशैभर एकै पटक सामुहिक प्रदर्शन गरेका छन् ।
अभियान्ताहरुले ७ बुँदे मागसहित दिउँसो ३ बजे देशैभर सामुहिक प्रदर्शन गरेका हुन् । विराटनगरको ट्राफिक चौकमा भएको प्रदर्शनमा सहभागी किशोरीहरूले ‘सरकार, म मेरो समाजमा सुरक्षित छैन’, ‘स्टप रेप’,‘कपडा साने हैन सोच सानो’,‘समाज पनि हो दोषी’, ‘घरभित्रै पनि होसियार ’, ‘बलात्कारीको लिंग हुँदैन’, ‘नो मिन्स नो’, ‘हामी चुप कहिले सम्म ?’, ‘सरकार तेरो पाराले दुःख पायो साराले’, ‘पितृ सत्ताको नियमले हामीलाई सधै अन्याय गर्छ’ जस्ता नारा लेखिएका प्ले कार्डसहित प्रर्दशनमा उत्रिएका थिए ।
यस अभियानले सरकार समक्ष जबर्जस्ती करणीको जाहेरीका लागि हद म्याद हुन नहुने, कम सजायको प्रावधान हटाउनुपर्ने, जबर्जस्ती करणीका कसुरदारलाई आममाफी दिन नहुने, पीडित १८ वर्षभन्दा मुनि छ भने कसुरदारलाई आजीवन कारावास र १८ वर्षभन्दा माथिको छ भने कसुरदारलाई जन्मकैद (२५ वर्ष) को व्यवस्था हुनुपर्ने तथा जाहेरी दर्ता भएदेखि अदालती प्रक्रिया सुरु नभएसम्म महिला आयोग र मानवअधिकार आयोगका अधिकारी अनुसन्धान प्रक्रियामा प्रतिनिधि राखिनुपर्ने माग राखेको छ ।
त्यस्तै, मुलुकी अपराध संहिताको दफा २१९ मा लेखिएको ‘कसैले कुनै महिलालाई निजको मञ्जुरी नलिई करणी गरेमा…’ भन्ने शब्दावलीमा यसलाई ‘कुनै व्यक्तिले कुनै व्यक्तिलाई…’ बनाउनुपर्ने र यसै दफामा रहेको ‘बालिका’ शब्दलाई ‘बालबालिका’ बनाउनुपर्ने उनीहरुले माग गरेका छन्।
पछिल्लो समय देशमा बलात्कारका घटना बढेको र दोषी उम्किएको भन्दै विभिन्न ठाउँमा व्यापक प्रदर्शन हुँदै आएका छन् ।
