विराटनगर,जेठ ४ – भिभो आइपिएल २०१८ अन्तर्गत आज चेन्नाई सुपर किङ्स र दिल्ली डेयरडेभिल्स भिड्ने छन् । सो खेल राति फिरोज शाह कोट्ला स्टेडियममा नेपाली समयअनुसार बेलुका ८.१५ बजे सुरु हुने छ ।
१२ खेलमा ८ जित दर्ता गर्दै १६ अंकका साथ तालिकाको दोस्रो स्थानमा रहेको चेन्नाई आजको खेल जित्न सके शीर्ष २ मा रहने पक्का हुनेछ ।
दिल्ली भने अन्तिम ४ मा पुग्ने सम्भावना समाप्त भएको छ भने तालिकाको अन्तिम स्थानमा रहेको छ । १२ खेलबाट दिल्लीको केवल ६ अंक रहेको छ ।
यस भन्दा अघिल्लो खेलमा पनि दिल्ली रोयल च्यालेन्जर्स बेंग्लौरसँग हारेको थियो । सो खेलमा दिल्लीका लागि नेपाली स्पिनर सन्दिप लामिछानेले डेब्यु गर्दै प्रभावकारी प्रदर्शन गरेका थिए । उनले भारतीय ब्याट्सम्यान पार्भिव पटेलको विकेट लिँदै ४ ओभरमा केवल २५ खर्चेका थिए ।
बैंग्लोरविरुद्धको राम्रो प्रदर्शनपछि उनले फेरी टोलीमा स्थान बनाउने लगभग पक्का रहेको छ । चेन्नाई सुपर किङ्स विरुद्ध कति विकेट लेलान भन्दै दिल्लीले आफ्नो पेजमा सन्दिपको फोटो राखेको छ । यसले पनि सन्दिपलाई खेलाउने संकेत देख्न सकिन्छ ।
सन्दिपसँगै साउथ अफ्रिकी खेलाडी जुनियर डालाले पनि अघिल्लो खेलमा डेब्यु गरेका थिए । तर उनले आफ्नो ३ ओभरमा ३४ रन खर्चेका थिए । दिल्लीले आज डालाको विकल्प हेर्न सक्नेछ ।विश्वका दुई उत्कृष्ट खेलाडी विराट कोहली र एबी डि भिलियर्सलाई बलिङ गरेका सन्दिपले आजको खेलमा महेन्द्र सिंह धोनी, शेन वाट्सन र सुरेश रैनाजस्ता विश्वस्तरिय खेलाडीलाई बलिङ गर्न सक्ने छन् ।
