३० कार्तिक, वीरगञ्ज ।
शनिबार राति पर्साको बहुदरमाइ नगरपालिकामा आगलागीमा परि १५ वर्षकी एक किशोरीको मृत्यु भएको छ।
आगलगीका कारण बहुदरमाई –८ रामनगरीका मनबोध साहकी १५ वर्षकी छोरी मनाकुमारी साहको मृत्यु भएको वडाध्यक्ष पुनिलाल साह तेलीले जानकारी दिए ।
शनिबार रति करिब १० बजे साहको घरमा बालिएको दियोबाट आगालागी भएको थियो । आगलागी हुँदा घरमै सुतिरहेकी किशोरी साहको जलेर मृत्यु भएको थियो ।
घरका अन्य सदस्य भने भागेर ज्यान जोगाउन सफल भए । आगलागीले फुसको घरमा रहेको लत्ताकपडा, खाद्यन्न लगायतका सामानहरु जलेर नष्ट हुँदा करिब ५ लाख बराबरको क्षति भएको तेलीको भनाई छ।
नगरपालिकासँग आफ्नै दमकल नभएकोले समयमै दमकल पुग्न सकेको थिएन । स्थानीय र प्रहरी मिलेर आगो नियन्त्रणमा लिएको वडाध्यक्ष तेलीले बताए ।
मृतक किशोरीको शव पोष्टमार्टमका लागि वीरगञ्जस्थित नारायणी अस्पतालमा पठाइएको ईलाका प्रहरी कार्यालय पोखरियाले जानकारी दिएको छ ।
