२४ मंसिर, एजेन्सी ।
अमेरिकाको राष्ट्रपतिमा निर्वाचित जो बाइडनले आफूले सत्ता सम्हालेको सय दिनमा १० करोड जनसंख्यालाई कोरोना विरुद्धको खोप लगाउने योजना सार्वजनिक गरेका छन्
बाइडन आगामी जनवरी २० मा राष्ट्रपतिका रुपमा ह्वाइट हाउस प्रवेश गर्दै छन् । गत नोभेम्बरमा भएको अमेरिकाको राष्ट्रपतीय निर्वाचनमा वर्तमान राष्ट्रपति डोनाल्ड ट्रम्पलाई बाइडनले हराएर राष्ट्रपतिमा निर्वाचित भएका हुन्।
विश्वमै संयुक्त राज्य अमेरिका कोरोना भाइरसबाट सबैभन्दा प्रभावित छ । पछिल्लो समय संक्रमणको दर अहिलेसम्मकै उच्च देखिरहेका बेला बाइडनले आफ्नो खोप योजना सार्वजनिक गरेका हुन्। बाइडनले आफूले सत्ता सम्हालेको पहिलो महिना नै कोरोनाको प्रकोप अन्त्य नहुने तर कोभिड १९ को अध्ययय भने परिवर्तन गर्ने प्रतिवद्धता व्यक्त गरे ।
यसअघि नै बाइडनले अमेरिकीहरुलाई सय दिनका लागि मास्क लगाउन आग्रह गरिसकेका छन्। मंगलबार मात्रै अमेरिकाले कोरोना विरुद्धको खोप फाइजर बायोएनटेकलाई अमेरिकामा प्रयोग गर्नका लागि स्वीकृति प्रदान गरिसकेको छ । अमेरिकामा हालसम्म १ करोड ५५ लाखभन्दा बढी संक्रमित भएका छन् भने २ लाख ९३ हजारभन्दा बढीको कोरोना संक्रमणकै कारण मृत्यु भइसकेको छ ।
