१ पौष, काठमाडौं । वैदेशिक रोजगार विभागका महानिर्देशक कुमार दाहालले वैदेशिक रोजगारीको क्रममा भएका ठगीका सबै उजुरी विभागले महत्वका साथ हेर्ने बताएका छन् ।
अन्तर्राष्ट्रिय आप्रवासी दिवशका अवसरमा श्रम मन्त्रालय र पौरखी नेपालको आयोजनामा सञ्चालित भर्चुअल कार्यक्रममा बोल्दै महानिर्देशक दाहालले विभाग सधैं पीडितको लागि उभिएको बताएका हुन् ।
कार्यक्रममा उपस्थित पीडितहरुले आफू म्यानपावरबाट ठगिएकादेखि रोजगारदाताले तलब नदिएका गुनासाहरु गरिरहँदा निर्देशक दाहालले यस्ता उजुरी विभागमा किन नआएको भन्दै पीडितलाई तत्कालै उजुरी दिन पनि आग्रह गरे ।
म्यानपावरले ठगेको हो भने उसलाई बोलाएर कारबाही गर्ने र गन्तव्य देशमा रोजगारदाताबाट ठगिएको हो भने सम्बन्धित देशमा रहेको नेपाली दूतावासलाई सम्पर्क गरेर न्याय दिलाउन पनि आफू लागि पर्ने महानिर्देशक दाहालले बताए ।
यस्तै उनले वैदेशिक रोजगारीमा रहेका नेपाली श्रमिकलाई आप्रवासी दिवसको शुभकामना व्यक्त गर्दै इमान्दारिताका साथ काम गर्न पनि आग्रह गरे ।
