७ पुष, धरान । धरानबाट प्रहरीले २ थान पेस्तोलसहित दुई जनालाई पक्राउ गरेको छ ।
सोमबार करिब २ बजे धरान १५ सयपत्री मार्गबाट पक्राउ परेकाहरुलाई प्रहरीले आज मंगलबार मात्र सार्वजनिक गरेको हो । ईलाका प्रहरी कार्यालय धरानका अनुसार पक्राउ पर्नेमा २७ वर्षिय देवीबहादुर लिम्बु र २६ वर्षिय रनसुर राई रहेका छन । उनीहरु दुवै देवीबहादुरको घरबाट नै पक्राउ परेका हुन । डिएसपी ज्ञानेन्द्र बस्नेतका अनुसार प्रहरीलाई लागुऔषध बेचबिखन भइरहेको भन्ने गोप्य सूचना आएको थियो । सोही आधारमा प्रहरी देवीबहादुरको घरमा पुगेर कोठा खानतलासी लिएको थियो । सोही क्रममा देवीबहादुर सुत्ने लो बेडको घर्रामा २ थान पेस्तोल फेला परेको डिएसपी बस्नेतले बताए । प्रहरीले लिम्बुको कोठाबाट मेड इन यु.एस.ए. लेखिएको म्याग्जिनसहित अटोमेटिक एक थान पेस्तोल र अर्काे म्योग्जिन नभएको पेस्तोल बरामद गरेको जनाएको छ ।
