१३ पुस, नेपालगञ्ज।
नेपाली कांग्रेसका केन्द्रीय सदस्य गगन थापाले राष्ट्रपति र प्रधानमन्त्रीको मिलेमतोमा संविधानमाथि ठूलो प्रहार भएको बताएका छन् ।
नेपालगञ्जमा सोमबार कांग्रेसले गरेको विरोध प्रदर्शनपछिको सभालाई सम्बोधन गर्दै थापाले प्रधानमन्त्री केपी शर्मा ओलीले आफ्नै दलभित्र अविश्वासको प्रस्ताव समेत खेप्न डराएर गत पुस पाँचमा संविधानविपरीत प्रतिनिधि सभा भंग गरेका थिए ।
थापाले प्रधानमन्त्री र राष्ट्रपतिलाई संविधान भंग गर्ने कुनै अधिकार जनताबाट लेखिएको संविधानमा नभएको बताए । उनले भने, ‘त्यो मुद्दा सम्मानित सर्वोच्च अदालतमा छ । सम्माननीयहरूले संविधान हेरेर निर्णय लिदा न्याय मिल्ने विश्वास आम जनताको छ ।’ अदालतमाथि जनताको भरोसा रहेको थापाले बताए ।
नेपाली कांग्रेसका नेता गगन थापाले प्रधानमन्त्री केपी शर्मा ओलीले आफ्नो रक्षाका लागि संसद विघटन गरेर कायरता प्रदर्शन गरेको बताएका छन् । संसद विघटनको विरोधमा कांग्रेसले घोषणा गरेको देशव्यापी विरोध कार्यक्रममा नेपालगञ्जमा संबोधन गरेका थापाले ‘कायर’ प्रधानमन्त्रीले आफ्नो रक्षाका लागि जाल–झेल गरेको आरोप लगाए ।
नेपालको संविधान अनुसार संसदमा टाउको गनेर प्रधानमन्त्री बनेका ओलीले संविधान बमोजिम संसदको अधिवेशन नबोलाएर राष्ट्रपतिको सहारामा संसदको विघटन गर्दा संविधान, लोकतन्त्र र जनभावनामाथि एक्साथ कुठाराघात भएको आरोप लगाए ।
थापाले भने, “विगतमा संसदीय व्यवस्थामा देखिएको कमजोरीका कारण संविधानमा संसद विघटनको प्रावधान हटाइएको थियो । तर, प्रधानमन्त्री र राष्ट्रपतिले संविधान मिचेर विघटन गरेका छन् ।” उनले विगत तीन वर्षमा ओलीले एकपछि अर्को अपराध र कुकर्म गरेर देश र जनतामाथि अपमान गरेको बताए ।
थापाले देश नै अनिश्चयमा फस्ने अहिलेको अवस्था ओलीबाट मात्र आएको नभई पुष्पकमल दाहाल, माधवकुमार नेपाल र झलनाथ खनाल पनि दोषी रहेको बताए । “ दाहाल, नेपाल र खनालले ओलीको कुशासनविरुद्ध मौनता साँध्नाको परिणामस्वरुप अहिलेको अवस्था आएको हो,” थापाले भने ।
संसद विघटन गरेर संविधान र लोकतन्त्रमाथि प्रहार भएको भन्दै ओलीको कदम नसच्चिए आगामी दिन नेपाल र नेपालीका लागि कठिन हुने उनको दाबी छ ।
“संसद विघटनको विषय अहिले अदालतमा विचाराधीन छ, म र मेरो पार्टी स्वतन्त्र न्यायालयमाथि विश्वास राख्छौं,” थापाले भने, “अदालतले विगतमा राजाको प्रत्यक्ष शासनको समयमा शाही आयोग खारेज गरेको थियो ।
अहिले पनि निष्पक्ष, कतैबाट प्रभावित नभई न्याय निरुपण हुनेमा विश्वस्त छौं ।” उनले केपी शर्मा ओलीले बाध्य भए मात्र चुनाव गराउने भन्दै त्यसका लागि कांग्रेसले चनाखो भएर बस्नुपर्ने बताए ।
