२० माघ, विराटनगर ।
नेपालमा पानी पार्ने पश्चिमी वायुको प्रणाली भित्रिन लागेकाले विहीबारदेखि तीन दिनसम्म मौसम बद्ली भएर वर्षा हुने सम्भावना रहेको जल तथा मौसम पूर्वानुमान महाशाखाले जनाएको छ ।
महाशाखाका अनुसार अहिलेसम्मको अवस्थाले पर्सि विहीबार पश्चिमी क्षेत्रबाट यो प्रणाली प्रवेश गर्ने देखिएको छ ।
यस्तै यति बेला देशका पहाडी भू–भागमा बाहेक मौसम सामान्यतया सफा रहेको महाशाखाले जनाएको छ ।
हाल पश्चिमी न्यूनचापीय रेखाको आंशिक प्रभावले पहाडी भू–भागमा आंशिक बदली रहेको विभागको भनाइ छ ।
मंगलबार प्रदेश नं १, सुदूरपश्चिम र गण्डकी प्रदेशका उच्च पहाडी तथा हिमाली भू–भागका एक–दुई स्थानमा हल्का हिमपातको सम्भावना रहेको महाशाखाले प्रक्षेपण गरेको छ ।
यस्तै, तराईका भू–भागहरुमा हुस्सु्–कुहिरो लाग्ने सम्भावना रहेकोले चिसोबाट बच्न आवश्यक सतर्कता अपनाउन महाशाखाले अनुरोधसमेत गरेको छ ।
मंगलबार राति सदूरपश्चिम प्रदेश र अन्य देशका पहाडी भू–भागमा आंशिक बदली रही बाँकी भू–भागहरुमा मौसम सामान्यतया सफा रहनेछ ।
प्रदेश नं १, सुदूर पश्चिम र गण्डकी प्रदेशको उच्च पहाडी तथा हिमाली भू–भागका एक–दुई स्थानमा भने हल्का हिमपातको सम्भावना रहेको महाशाखाले बुलेटिन जारी गर्दै जानकारी दिएको हो ।
