७ फागुन । गत फेब्रुअरी १ मा सेनाले कू मार्फत सत्ता हत्याएपछि म्यानमारमा विरोध प्रदर्शन जारी छ ।
जननिर्वाचित सरकारलाई अपदस्त गरेर सत्ता हत्याएको सेनाले गत नोभेम्बरमा भएको चुनावमा धाँधली भएको बताउँदै आएको थियो । नेशनल लिग फर डेमोक्रेसीको सरकार हटाएर सत्ता हातमा लिएको सेनाले एक वर्षभित्र निर्वाचन गर्ने भनेको छ । तर वर्षौ शासन लागू गरेको सेनाले निर्वाचन गराउँछ भन्नेमा विश्वस्त नभएर सेनाको विरोधमा प्रदर्शन चर्किरहेको छ । अन्तर्राष्ट्रिय समुदाय र देशभित्रकै शक्तिहरूले सैनिक कूको कडा विरोध गरेपछि सेनालाई दबाब परिरहेको छ । सेनाको विरोधमा भइरहेको प्रदर्शनमा पहिलो पटक शुक्रबार एकजनाको मृत्यु भएको छ । २० वर्षिय ती महिलालाई अघिल्लो साता प्रदर्शनका क्रममा सुरक्षाकर्मीले चलाएको गोली लागेको थियो । उपचारका क्रममा शुक्रबार मृत्यु भएको अस्पतालले जनाएको छ । सेनाले मानवअधिकारवादीको रुपमा अन्तर्राष्ट्रिय रुपमै प्रशिद्ध नेतृ आङ साङ सुकी समेतका नेताहरुलाई नजरबन्दमा राखेको छ । गत नोभेम्बरमा भएको निर्वाचनमा सुकी नेतृत्वको एनएलडीको जितलाई सेनाले अस्विकार गर्दै धाँधलीको आरोप लगाएपनि निर्वाचन आयोगले आरोप मिथ्या भनेको छ । तर संसदको वैठक बस्ने दिन नै सेनाले सत्ता हत्याउँदै संकटकाल लगायो । सैन्य कूपश्चात हजारौँ मानिसहरू विरोध प्रदर्शनका निम्ति सडकमा उत्रिएका छन । मुख्य शहर यांगुनमा प्रदर्शनकारीहरूले सैन्य तानाशाहको विरोधमा अनि प्रजातन्त्रको पक्षमा नाराबाजी गरेका छन । दङ्गा नियन्त्रणका लागि आवश्यक बन्दोबस्तीका साथ उत्रिएका प्रहरीहरूले शहरको केन्द्र भागमा जाने बाटाहरू छेकेका छन । त्यहाँ अहिले इन्टरनेट सेवा बन्द गराइएको छ । यसअघि पनि म्यानमारमा १९६२ देखि लिएर २०११ सम्म देशमा सैनिक शासन रहेको थियो । लामो समयको जनदबाबलाई थेग्न नसकेपछि बाध्य भएर सेना सन् २००८ मा पहिलोपटक संविधान जारी गर्न सहमत भएको थियो । त्यही संविधानलाई टेकेर तीन वर्षपछि बर्मामा पहिलो नागरिकको सरकार बन्यो । २०१५ मा पहिलो निर्वाचन मार्फत नेतृ सुकीको दलले सरकारको नेतृत्व गरेको थियो भने गत नोभेम्बरमा भएको निर्वाचन म्यानमारको इतिहासमा दोस्रो जननिर्वाचन हो ।
