९ फागुन, भैरहवा ।
भैरहवामा निर्माणाधीन गौतम बुद्ध अन्तर्राष्ट्रिय विमानस्थलको काम अन्तिम चरणमा पुगेको छ ।
विमानस्थल निर्माण आयोजनाले भौतिक संरचना निर्माण लगभग सकिएको र अगामी तीन महिनाभित्र सञ्चालनमा आउने जनाएको छ । विमानस्थल निर्माण कार्यमा हाल करिब ९५ प्रतिशत भौतिक प्रगति भएको आयोजनाले जनाएको छ । विदेशबाट प्राविधिक जनशक्ति ल्याइनुपर्ने भएकाले प्राविधिक उपकरण जडानको काम बाँकी छ ।
विदेशी दक्ष प्राविधिक जनशक्ति धमाधम आइरहेको र विमानस्थलका लागि विदेशबाट आउनुपर्ने उपकरण करिब सबै आइसकेको आयोजना प्रमुख प्रवेश अधिकारीले जानकारी दिए।
दक्षिण कोरियाबाट विज्ञ प्राविधिक आइसकेको र एक–दुई दिनभित्रै अमेरिकाबाट थप दुई जना विज्ञ प्राविधिक आउँदै गरेको तथा भारतबाट झन्डै १५ जना प्राविधिक जनशक्ति आउने भएकोले उपकरण जडानको काम एकदेखि डेढ महिनाभित्र सकिने अधिकारीले जानकारी दिए ।
हाल विमानस्थलको सौन्दर्यीकरणका लागि साज सजावट तथा रङ रोगनको कार्य भइरहेको भए पनि विमानस्थलको टर्मिनल भवनमा उपकरण जडानको काम भने बाँकी रहेको छ ।
