४ वैशाख, एजेन्सी ।
हरिद्वारमा भएको कुम्भ मेलामा सहभागी महानिर्वाणी अखडाका महामण्डलेश्वर स्वामी कपिल देवको कोरोना भाइरसको संक्रमणका कारण मृत्यु भएको छ।
मेला क्षेत्रमा कोभिड–१९ का कारण मृत्यु हुने स्वामी कपिल देव पहिलो साधु रहेको मेला आयोजक समितिलाई उद्धृत गर्दै भारतीय सञ्चारमाध्यमले जनाएका छन्। चित्रकूटका बस्ने स्वामी कपिल देवको उमेर ६५–७० वर्ष रहेको बताइन्छ।
कोरोना भाइरसको संक्रमण तीव्र गतिमा फैलिरहेका बेला कुम्भ मेलामा सहभागी झण्डै दुई हजारजनामा संक्रमण पुष्टि भएको छ। यहिबिचमा निरञ्जनी अखडाले कुम्भ मेलाबाट बाहिर जाने निर्णय गरेको खबर आइरहेको छ।
तर अखडा परिषद्का महामन्त्री हरि गिरीले सो खबर गलत रहेको बताएका छन्। समाचार संस्था पिटिआईका अनुसार निरञ्जनी अखडाका सचिव रविन्दर पुरीले जारी गरेको बयानमा भनिएको छ, ‘१४ अप्रिलमा संक्रान्तिको अवसरमा भएको मुख्य स्नान सकिएको छ।
हाम्रो अखडाका धेरै व्यक्तिमा कोभिड–१९ को लक्षण छ। त्यसैले हाम्रा लागि कुम्भ मेला सकियो।’ तर महामन्त्री हरि गिरीले खबर सत्य नरहेको दाबी गरेका छन्।
उनले बिबिसीसँग भनेका छन्, ‘निरञ्जनी अखडा बाहिरियो भन्ने खबर पूर्ण रुपमा गलत हो। यहाँ कयौँ सय साधु छन्। निरञ्जनी अखडाका केही महात्मा पक्कै पनि भन्न सक्छन् कि उनीहरु जाँदै छन्। तर अखडा पूरै मेला छोडेर जाँदैन। महात्मा आउँछन् जान्छन्।’
पछिल्लो परिस्थितिबारे छलफलका लागि अखडाहरुको बैठक हुने उनले बताएका छन्। तर मेला अधिकारी रामजी शरण शर्माले भने निरञ्जनी अखडा मेलाबाट बाहिर गएको पुष्टि गर्दै त्यसको स्वागत गरेका छन्। बाँकी अखडा पनि बिस्तारै मेलाबाट बाहिर जाने अपेक्षा रहेको उनले बताए।
यसैबिच अखडा परिषदका अध्यक्ष महन्त नरेन्द्र गिरी कोरोना भाइरसको संक्रमणका कारण अस्पतालमा छन्। कुम्भ मेलामा फैलिरहेको कोरोना भाइरसको संक्रमणलाई लिएर चिन्ता बढ्दै गएको छ।
हरिद्वारका प्रमुख स्वास्थ्य अधिकारी डा. एसके झाका अनुसार १०–१४ अप्रिलको बिचमा कुम्भ मेला क्षेत्रमा १६ सय ६४ जनामा कोरोना भाइरसको संक्रमण पुष्टि भएको थियो। त्यसमध्ये ३५ जना साधु हुन्। मेला क्षेत्रमा संक्रमण दर ०.२९ प्रतिशत छ।
