८ बैशाख, एजेन्सी । अफ्रिकी मुलुक चाडका राष्ट्रपति इद्रिस डेबी विद्रोहीसंगको भिडन्तमा मृत्यु भएको छ ।
लिवियासँगको सीमा जोडिएको उत्तरी क्षेत्रमा सेना र विद्रोहीबीच भएको भिडन्तमा राष्ट्रपति डेबी मारिएको हो ।
राष्ट्रपति डेबी गत सप्ताहन्त लिवियासंगको सीमा नजिकको क्षेत्रमा सेनाले विद्रोहीसंग संघर्ष गरिरहेको बेसमा पुगेको समयमा भिडन्त भएको थियो ।
भिडन्तमा घाइते भएका राष्ट्रपति डेबीको उपचारका क्रममा मंगलबार निधन भएको हो ।
उहाँको निधनसंगै सरकार र संसद विघटन गरिएको छ । सैन्य परिषद्ले आगामी १८ महिनासम्म मुलुकको नेतृत्व गर्ने जनाइएको छ ।
गत शनिवारबाट शुरु भएको भिडन्तमा ३ सय जना विद्रोहीसमेत पक्राउ परेका छन् ।
त्यहाँका सेना जर्नेलले भिडन्तमा पाँच जना सेनाको मृत्यु र ३६ जना घाईते भएकोसमेत बताएको अन्तर्राष्ट्रिय संचारमाध्यमहरुले उल्लेख गरेका छन् ।
