८ मंसिर, काठमाडौं।
नेकपा माओवादी केन्द्रका अध्यक्ष पुष्पकमल दाहाल प्रचण्डले आफूले जनतासँग सुनाएका योजना तत्कालीन प्रधानमन्त्री केपी शर्मा ओलीले पूरा नगरिदिएको बताएका छन्। बुधबार धनगढीमा आयोजित एक कार्यक्रममा सम्बोधन गर्दै उनले ओली खलनायक परेको बताए।
उनले भने, ‘मैले त एउटा सपना देखेको थिएँ, कम्युनिस्टहरुलाई एक गरेपछि देशमा राजनीतिक स्थायित्व होला। छिटोछिटो विकास होला। सामाजिक न्याय होला भनेर केपी ओलीलाई मैले नै दुईपटक प्रधानमन्त्री बनाएँ। तर नायक होइन, खलनायक परेछन्। मैले जनताको अगाडि बोलेको छ भने, प्रचण्डलेको बोलेको नगर्ने कसम खाएछन् ।’
आफूले भनेको नमान्दा एमाले अध्यक्षसमेत रहेका केपी शर्मा ओलीको प्रधानमन्त्री पद गुमाउनु परेको बताउँदै प्रचण्डले यसपटक भने त्यसो नहुने बताए ।
प्रचण्डले भने, ‘मैले भन्याजति केही काम नगर्ने कसम खाए केपी ओलीले । त्यही भएर उनी बालुवाटारबाट बालकोट पुगे । अहिले सातै प्रदेशबाट सरकारबाट हात धुनुपर्याछ ।’
उनले आफू अहिले प्रधानमन्त्री पदमा नभए पनि प्रधानमन्त्रीभन्दा कम नभएको बताएका छन् ।कार्यक्रममा प्रचण्डले भने, ‘हुन त अहिले म प्रधानमन्त्री छैन । तर प्रधानमन्त्रीभन्दा कम पनि छैन ।’