विराटनगर, साउन २७
स्पेनिस डिफेण्डर जेरार्ड पिकेले अन्तर्रा्ष्ट्रिय फुटबलबाट सन्यास लिएको घोषणा गरेका छन् । ३१ वर्षीय युवा खेलाडी सेनटर ब्याक पिकेले स्पेनिस टोलीका लागि सन् २००९ देखि २०१८ सम्म १०२ क्याप जितेका छन् भन पाँच गोलसमेत गरेका छन् ।
उनी सन् २०१० मा स्पेनले विश्वकपको उपाधि जित्दा टिमका महत्वपूर्ण सदस्य थिए । त्यस्तै स्पेनलाई सन् २०१२ को युरो च्याम्पियन बनाउन पनि उनको योगदान महत्वपूर्ण थियो ।
पिकेले हालै भएको रुस विश्वकपको छनोट चरण सुरु भएदेखि नै विश्वकपपछि फुटबलबाट सन्यास लिने सोच बनाएको बताएका छन् । उनले अनावश्यक विवादको भूमरीबाट बाहिर शान्त बस्न उपयुक्त बताएका छन् ।
स्पेनको उत्तर पूर्वी राज्य क्याटालोनियाको स्वतन्त्रताको पक्षमा खुलेर समर्थन गरेको भन्दै राजधानी मड्रिडका समर्थकहरुले उनको आलोचना गरेका थिए । तर, बार्सिलोनाका यी सेन्टर ब्याकले अन्तिमसम्म आफ्नो अडान यथावत राखे । सरकारले जनताको मत सुन्नुपर्ने उनको धारणा थियो ।
