१५ फागुन, एजेन्सी । रुसी सेनाले युक्रेनमा हमला गर्न थालेको आज चौथो दिनमा युक्रेनको इन्धन केन्द्र र हवाइ अड्डालाई निशाना बनाइरहेको छ ।
युक्रेनी सेनाको कडा प्रतिरोधपछि रुसी हमलाले सोचेजस्तो गति लिन नसकेपछि उसले इन्धन भण्डार र हवाइ अड्डालाई निशाना बनाउन थालेको हो ।
रुसी सेनाले युक्रेनको राजधानी किएभबाट दक्षिणमा अवस्थित भासिलकिभ सहरस्थित एक तेल भण्डारमा मिसाइल आक्रमण गरेको छ ।
मिसाइल हमलालगत्तै उक्त भण्डारमा आगलागी भएको छ । सार्वजनिक भएका भिडियो फुटेजमा आकाशमा आगो बलिरहेको देखिन सकिन्छ ।
तेल भण्डारमा आगो लागेपछि युक्रेनको राजधानी किएभका मानिसलाई विषालु धुवाँबाट सुरक्षित रहन र घरका झ्यालहर नखोल्न भनिएको छ ।
यता खार्किभस्थित एक ग्यास पाइपलाइन रुसी सेनाले ध्वस्त बनाएको राष्ट्रपति कार्यालयले जनाएको छ । रुसी सेना उक्त क्षेत्रमा प्रवेश गरिसकेको अधिकारीहरूले बताएका छन् । रुसी सेना प्रवेश गरेसँगै त्यहाँका बासिन्दालाई सुरक्षित स्थानबाट बाहिर ननिस्किन भनिएको छ ।
रुसले अन्य सहरमा समेत रकेट तथा मिसाइल प्रहार गरेको छ । खार्किभको एक नौ तले भवनमा रकेट हमला हुँदा एक महिलाको ज्यान गएको छ भने अन्य केही व्यक्ति घाइते भएका छन् । विस्फोट र भीषण लडाइँबीच मानिसहरू भूमिगत मेट्रो स्टेसनमा शरण लिन पुगेको अन्तर्राष्ट्रिय सञ्चारमाध्यमले जनाएका छन् ।
हाल राजधानी किभसहित कैयौं सहरमा दुवै पक्षबीच लडाइँ भइरहेको छ । तर, किभ आफ्नो नियन्त्रणमा रहेको युक्रेनका अधिकारीहरूले बताएका छन् ।
