विराटनगर,साउन ३०
चालू आर्थिक वर्षभित्र ७ सय ३७ मेगावाट विद्युत केन्द्रीय प्रसारण प्रणालीमा थपिने भएको छ । राष्ट्रिय गौरवको ४ सय ५६ मेगावाटको माथिल्लो तामाकोसीसहित निर्माणको विभिन्न चरणमा रहेका १७ आयोजना यसै वर्ष पूरा हुने भएपछि ७ सय ३७ मेगावाट विद्युत केन्द्रीय प्रसारण प्रणालीमा थपिने भएको हो ।
नेपाल विद्युत प्राधिकरण प्रवक्ता प्रबल अधिकारीका अनुसार माथिल्लो तामाकोसी, ४० मेगावाटको खानी खोला–१, २७ मेगावाटको दोर्दी खोला, २३.५ मेगावाटको सोलु खोला, २२.२ मेगावाटको माथिल्लो चाकुबाट विद्युत उत्पादन हुने छ ।२२ मेगावाटको बागमती, २५ मेगावाटको दोर्दी ‘ए’, २५ मेगावाटको काबेली बि–१, २२ मेगावाटको तल्लो हेवा, २० मेगावाटको तल्लो मोदी र ८ मेगावाटको माथिल्लो नौगाडले पनि चालू आवमा उत्पादन थाल्ने आयोजना हुन् ।
माथिल्लो तामाकोसीबाट आगामी पुसमा विद्युत उत्पादन सुरु गर्ने तालिका भएपनि केही पछि सर्ने देखिएको छ । अधिकारीका अनुसार निर्मणको अन्तिम चरणमा पुगेका ८.८ मेगावाटको रुदी खोला ‘ए’ ९.९ मेगावाटको इवा खोला, ३.३ मेगावाटको गेलुङ खोला र ३.३३ मेगावाटको कापडीगाड यसै वर्ष पूरा हुनेछन् भने ६.४२ मेगावाटको माथिल्लो मैलुङ, १४.८ मेगावाटको माथिल्लो साञ्जेन राष्ट्रिय प्रसारणमा जोडिने भएका छन् ।
यी आयोजनाबाट विद्युत उत्पादन सुरु भएपछि विद्युतको माग व्यवस्थापन सहज भई भारतमाथिको परनिर्भरता घट्ने प्राधिकरणको दाबी छ । प्राधिकरणसँग पिपिए (विद्युत खरिद सम्झौता) भएका २३ सय ५६ मेगावाटका १ सय ७ आयोजना निर्माणाधीन अवस्थामा रहेको जनाईएको छ ।
१ सय ११ मेगावाटको रसुवागढी, १ सय २ मेगावाटको मध्यभोटेकोसी,.८६ मेगावाटको सोलु दूधकोसी, ८२ मेगावाटको तल्लो सोलु, ५२ मेगावाटको लिखु –५, ४२ मेगावाटको मिस्ट्री खोला, ११ मेगावाटको नर्माजुन मादी, ३० मेगावाटको खानी खोला प्रमुख निर्माणाधीन आयोजना हुन् । पिपिए गरेका स्वदेशी लगानीमा निजी क्षेत्र र प्राधिकरणका सहायक कम्पनीले अघि बढाएका २३ सय ५६ मेगावाटका १ सय ७ आयोजना निर्माणाधीन छन् । थप १ हजार ६ सय ५८ मेगावाटका आयोजना पिपिए भई निर्माणको तयारीमा रहेका छन् ।
