२ जेठ, विराटनगर । विराटनगर महानगरपालिकामा १६ हजार ३४३ मत गणना गर्दा उपमेयर पदको सात हजार भन्दा बढी मत बदर भएको छ ।
सोमबार दिउँसोसम्म १६ हजार ३४३ मत गणना गर्दा मेयरमा पाँच हजार १४६ र उपमेयरमा सात हजार २११ मत बदर भएको हो ।
मुख्य निर्वाचन अधिकृतको कार्यालयका सूचना अधिकारी हेमबहादुर बुढाथोकीका अनुसार बदर भएको अधिकांश मत उम्मेदवार नभएको चुनाव चिह्नमा परेका थिए ।
‘उम्मेदवार नभएको पदमा परेको मत स्वत बदर हुन्छ,’ उनले भने, ‘मेयर–उपमेयर पदमा धेरै मत बदर भएका छन् ।’
१६ हजार ३ सय ४३ मत गणना गर्दा विराटनगरको मेयरमा कांग्रेस उम्मेदवार नागेश कोइरालाले पाँच हजार १८३, एमाले उम्मेदवार सागर थापाले तीन हजार ६६७,
स्वतन्त्र उम्मेदवार उमेश यादवले एक हजार ७२० र राप्रपा उम्मेदवार प्रह्लाद साहले ८३२ मत पाएका छन् ।
उपमेयरमा एमाले उम्मेदवार शिल्पा कार्कीले चार हजार १८२, जसपा उम्मेदवार अमरेन्द्र यादवले ३ हजार ८३, स्वतन्त्र उम्मेदवार नमिता न्यौपानेले ९२२ मत प्राप्त गरेकी छन् ।
वडा अध्यक्षमा भने बदर मत तुलनात्मक रुपमा कम छ । सूचना अधिकारी बुढाथोकीका अनुसार मतगणना सकिएका १९, १८,१७ र १६ नम्बर वडा अध्यक्षको मत कम बदर भएको हो ।
वडा नम्बर १७ मा जसपाका समिर करम निर्वाचित भएका छन् । उनी एक हजार १०५ मत ल्याएर निर्वाचित भएका हुन् । सो वडामा वडा अध्यक्षको २५४ मत बदर भएको छ । प्रमुखमा भने १७०१ मत बदर भएको छ । उपप्रमुखमा १७६१ मत बदर भएको छ ।
वडा नम्बर १९ मा उपप्रमुखमा १९३८ मत बदर भएको छ । प्रमुख पदमा ८५३ मत बदर भएको छ । सो वडाको वडाध्यक्षमा एमालेका श्याम घिमिरे निर्वाचित भएका छन् । वडाध्यक्ष पदको ३०८ मत बदर भएको थियो ।
वडा नम्बर १८ मा स्वतन्त्र उम्मेदवार जितेन्द्र साह निर्वाचित भएका छन् । सो वडामा प्रमुख पदको ९८१ र उपप्रमुख पदको १३१६ मत बदर भएको छ ।
वडा नम्बर १६ मा कांग्रेसका उद्धव भुजेल निर्वाचित भएका छन् । सो वडा अध्यक्षको २६७ मत बदर भएको छ । उपप्रमुख ११०२ र प्रमुख पदको ७५६ मत बदर भएको छ ।
नेपाली कांग्रेस विराटनगरका नगर सभापति दीपक चापागाई मत बदर हुने डरले गठबन्धन उम्मेदवारले एक छापे मत हाल्दा गठबन्धनको मत धेरै बदर भएको बताउँछन् । ‘वडा तहसम्म गठबन्धन नभएका कारण मत बदर हुनसक्ने भएका कारण एउटै लहरमा मतदान भयो,’ उनले भने ।
