४ साउन,काठमाण्डौ ।
वाम एकताका लागि तत्कालीन नेकपाका बहुमत सचिवालय सदस्यले गरेको प्रयासप्रति एमाले अध्यक्ष केपी शर्मा ओलीले तिखो टिप्पणी गरेका छन् । माओवादी केन्द्रका अध्यक्ष पुष्पकमल दाहाल ‘प्रचण्ड’, एकीकृत समाजवादीका अध्यक्ष माधव नेपाल, सम्मानित नेता झलनाथ खनाल,राष्ट्रिय एकता अभियानका संयोजक वामदेव गौतम र नेता नारायणकाजी श्रेष्ठ मंगलबार पनि वाम एकताका लागि भन्दै छलफलमा जुटेपछि ओली उनीहरुमाथि खनिएका हुन् । केही समययता एकताका लागि भन्दै उनीहरु निरन्तर छलफल गर्दै आएका छन् । त्यसैप्रति ओलीले कटाक्ष गर्दै फेरि अर्को फुटका लागि एकता भन्दै व्यंग्य गरेका छन् । एमाले बागमती प्रदेश कमिटी बैठकलाई सम्बोधन गर्दै ओलीले त्यस्तो बताएका हुन् । यस्तै उनले वर्तमान सत्ता गठबन्धन भत्काउनका लागि प्रयास गर्न नहुने पनि बताएका छन् । उनले सत्ता गठबन्धभित्रका दलका नेताका स्वार्थले आफैं फुट्ने पनि दाबी गरे ।
ओलीले आगामी निर्वाचनमा अहिलेको सत्ता गठबन्धनमा रहेका दलहरूलाई साथ लिन आवश्यक नभएको पनि तर्क गरे । ’यिनीहरूको उद्देश्यमा, गन्तव्यमा, एकता होइन स्वार्थको एकता हो । स्वार्थको एकता स्वार्थको टकरावमा बदलिन्छ । त्यसैले धेरै हतार गरेर यिनीहरूको एकता तोड्नका लागि चाँदीको तरबार बनाउनु आवश्यक छैन । स्वार्थको टकरावबाट आफै फुट्छ, आफ्नै हिसाबले,’ उनले भने । तत्कालीन नेकपामा आफूले दिएको शक्ति लिएर आफैलाई सडकमा पु¥याएको र कारबाही गरिएको स्मरण गर्दै ओलीले कांग्रेसको नेतृत्वमा सरकारमा रहेकाहरू वामपन्थी दल हुनै नसक्ने बताए । माओवादी र एकीकृत समाजवादी वामपन्थी दल भए एमाले वामपन्थी नहुने उनको भनाइ थियो । एमालेसँग गठबन्धन गर्ने हो भने अहिलेको सत्ता गठबन्धन छोड्नुपर्ने ओलीको सर्त छ ।
’कोही वामपन्थी भए गठबन्धन गर्न एमाले तयार छ । त्यसका लागि गठबन्धन छोडेर आउनुपर्छ,’ उनले भने । तर, उनीहरू एमालेसँग गठबन्धन गर्न आउनेमा आफू विश्वस्त नभएको उनको भनाइ थियो । ओलीले काँग्रेससंग मिल्न जाने बामपन्थी हुनै नसक्ने र उनीहरुको एकताको प्रयास भनेकै फेरि अर्को फुटका लागि हो र स्वार्थका लागि जोडिएका हुन् भनेर कटाक्ष गरिरहँदा यता नेकपा एकीकृत समाजवादी पार्टीका अध्यक्ष माधवकुमार नेपाल पनि केपी ओलीमाथि खनिएका छन् । ओलीकै कारण नेकपा विघटन हुन पुगेको उनले पुनः आरोप दोहोर्याएका छन् ।गत वैशाख ३० गते आफ्नो पार्टीबाट निर्वाचित जनप्रतिनिधिहरुलाई बुधबार काठमाडौंमा प्रशिक्षण दिने क्रममा नेपालले यस्तो बताएका हुन् ।
’हामीले विद्रोह गरेर आएका हौँ । नयाँ पार्टी बनाएर कमिटी बनिनसकेको अवस्थामा हामी निर्वाचनमा गयौँ’, उनले भने, ’ओलीका कारण कमरेड भन्नेहरु जति पाखा लागेर गए । पार्टीमा समस्या आए। पार्टीका बैठक बस्नै सकेनन्। बहुमत पुग्दैन कि भनेर बस्न छाडे। पार्टी चल्नै नसक्ने अवस्थामा पुगिसकेपछि पार्टीभित्र बस्न नसक्ने अवस्था भएपछि विद्रोह गर्यौँ।’
उनले एमाले ब्युँतिएपछि पनि आफूहरुलाई कारबाही गरेर निकाल्ने प्रयत्न थालिएको बताए । नेकपा विभाजनको प्रमुख कारण संसद विघटन पनि भएको नेपालको आरोप थियो । केही दिनअघि मात्रै नेपालले एमाले तथा एमालेका नेताहरुलाई गाली नगर्न आफ्ना कार्यकर्ताहरुलाई निर्देशन दिएका थिए । उनले एमाले आफ्नो पुरानो घर भएको र हाल उनीहरुले पनि आफूहरुलाई केही नभनेकाले एमालेका नेताहरुलाई गाली नगर्न उनले सुझाएका थिए । तर अहिले भने आफैं ओलीमाथि खनिएका हुन् । यस्तै नेपाल गठबन्धनप्रति पनि असन्तुष्ट रहेको जनाए । गत स्थानीय निर्वाचनमा गठबन्धनको गीत गाएर बस्दा पार्टी कमजोर भएको उनले स्वीकारेका हुन् । नेपालले गठबन्धनको कुनै भरोसा नभएको पनि जिकिर गरे ।
