१५ साउन,काठमाण्डौ ।
कलाकार आफ्ना अभिव्यक्तिका कारण बेलाबेलामा ट्रोलको सिकार बन्ने गर्छन् । आफूले थाहा नपाएको र तथ्य पुष्टि नभएको कुरामा बोल्दा उनीहरु विवादित भइरहेका छन् ।ज्योतिष तथा अभिनेता हरिहर अधिकारी यतिबेला आफ्नो यस्तै अभिव्यक्तिलाई लिएर विवादमा मुछिएका छन् । ट्वीटर र फेसबुकमा उनलाई ट्रोल बनाउने संख्या पनि उच्च छ ।
अमेरिकी अन्तरिक्ष नियोग नासामा दुई वर्ष संस्कृतको क्याप्सुल कोर्स हुने, अन्तरिक्षमा संस्कृत भाषाको माध्यमबाट सम्पर्क स्थापित गर्न सकिने, संस्कृत ब्रम्हाण्डीय भाषा भएको, संस्कृतको ओरिजिन सूर्यबाट आएकाले अन्तरिक्षबाहिर पनि त्यसले काम गर्ने, हरेक मन्त्र संस्कृतमा गर्दा त्यसको ध्वनि युनिभर्सभन्दा बाहिर जाने भन्दै अभिव्यक्ति दिएपछि हरिहर ट्रोलको सिकार भएका हुन् ।
ट्वीटरमा चिकित्सक, प्राध्यापकसहित बौद्धिक पेशा क्षेत्रका व्यक्तिदेखि सर्वसाधारणले पनि हरिहरको कुरामा तथ्य नभएको बताएका छन् । पडकास्टर सञ्जय गुप्तासँगको कुराकानीमा हरिहरले बोलेका यी कुरा अवैज्ञानिक भन्दै सामाजिक सञ्जालमा चर्को आलोचना भएको छ । गत महिना अभिनेत्री नीता ढुंगानासँग विवाह गरेका अधिकारीलाई राष्ट्रिय स्वतन्त्र पार्टीका सभापति रवि लामिछानेले दल प्रवेशको प्रस्ताव पनि गरेका थिए । हरिहर फिल्म ह्रस्वदीर्घ निर्माणको तयारीमा छन् ।
