२५ भदौ ,एजेन्सी ।
दार्चुलामा बाढि र पहिरोका कारण ठूलो जनधनको क्षति भएको छ । गएरातिदेखि महाकाली नदी र लास्कु खोलामा आएको बाढिले दर्जनौ घरमा क्षति पुगेको छ भने बाढी, पहिरोमा परि ५ जनाको मृत्यु भएको छ । जिल्लाका फरक फरक स्थानमा उनीहरूको शव भेटिएको दार्चुला जिल्ला प्रहरी कार्यालयका प्रहरी निरीक्षक जगत गाहामगरले जानकारी दिए ।
उनका अनुसार दार्चुलाको सदरमुकामस्थित खलङ्गाको बंगाबगड क्षेत्रमा पहिराले १५ घर बगाएको छ भने ४ जना बेपत्ता भएका छन् । यसैगरी महानकाली नगरपालिका २, मैखोलीमा ७७ वर्षीय नन्दराम बोहरा मृत भेटिएका छन् । यसैगरी नौगाड गाउँपालिका २, दललेखमा ६८ वर्षीय मोहनराज पार्की आफ्नै घरले थिचेर मृत्यु भएको अवस्थामा फेला परेको प्रहरी निरीक्षक गाहामगले जानकारी दिए ।
यस्तै नौगाड २ सल्लामा ३० वर्षीया जानकी ठगुना, १२ वर्षीया धनौली ठगुन्ना खोला किनारमा मृत भेटिएका छन् । यस्तै महानकाली नगरपालिकामा एउटा बेवारिसे शव भेटिएको उनले बताए । ‘यो शव बेपत्ता ४ मध्ये एक जनाको हो कि भन्ने अनुमान गरिएको छ’, घटनास्थलमा रहेका प्रहरी निरीक्षक गाहामगरले भने, ‘विस्तृत विवरण थाहा पाउन बाँकी छ, उद्धार जारी छ ।’ नौगाडमा आएको बाढि र पहिरोले आधादर्जन बढि घरहरुमा क्षति पुगेको स्थानीय प्रेमसिह ठगुन्नाले जानकारी दिए ।
पहिरोले पुरेर दुई जनाको मृत्यु भएको छ । खलंगास्थित दशरथनगर आधारभूत विद्यालय बाढिले बगाएको छ । दुहुँ र महाकाली जोड्ने लास्कु झोलुंगे पुल र मोटरवेल पुल लास्कु खोलाले बगाएको छ । दार्चुला तिंकर सडक अवरुद्ध भएको छ । दार्चुला तिंकर सडकमा पार्किङमा राखिएका चार वटा जिपहरु महाकालीले बगाएको छ । महाकाली नदी नियन्त्रण आयोजनाले निर्माण गरेको पक्की तटबन्धमा क्षति पु¥याएको छ । बाढिले घर भत्काउने क्रम जारी रहेको हुँदा सेना प्रहरी, सशस्त्र र स्थानीयले उद्धार गरिरहेका छन् ।
