सन्दीप अध्यागमनको कालोसूचीमा, प्रहरी ‘अलर्ट’

२६ भदौ ,काठमाण्डौ ।
नाबालिका बलात्कारको आरोप लागेका नेपाली राष्ट्रिय क्रिकेट टोलीका निलम्बित कप्तान सन्दीप लामिछानेलाई अध्यागमन विभागले पनि कालोसूचीमा राखेको छ। १७ वर्षीया नाबालिगमाथि बलात्कार गरेको आरोप लागेका उनलाई नेपाल आउनासाथ पक्राउ गर्ने गरी विभागले कालो सूचीमा राखेको हो।

त्रिभुवन अन्तर्राष्ट्रिय विमानस्थल सुरक्षा कार्यालयका अनुसार उनी जतिबेला पनि नेपाल आउन सक्ने हुँदा प्रहरीलाई ‘अलर्ट’ गरिएको छ। क्यारेबिएन प्रिमियर लिग (सीपीएल) खेल्न उनी वेष्टइन्डिज पुगेका बेला बलात्कार आरोपमा उनीविरुद्ध काठमाडौं प्रहरीमा उजुरी परेको छ ।

नेपाली क्रिकेट टिम केन्या उड्नु अघिल्लो रात उनले एक १७ वर्षीया किशोरीलाई बलात्कार गरेको आरोप छ । बलात्कार आरोपपछि नेपाल क्रिकेट संघ (क्यान) ले उनलाई राष्ट्रिय टिमबाट निलम्बन गरिसकेको छ भने सीपीएलले पनि उनलाई रिलिज गरिसकेको छ ।

सन्दीपलाई पक्राउ गर्न जिल्ला अदालत काठमाडौंले अनुमतिसमेत दिएपछि उनीविरुद्ध पक्राउ पूर्जी जारी भइसकेको छ । बलात्कार आरोप लागेपछि उनले आफू निर्दोष रहेको भन्दै आरोपको सामना गर्ने बताएका थिए । उनले आफू नेपाल फर्किने पनि बताएका छन् ।

तर, उनी कहिले नेपाल आउँछन् भन्ने विषयमा यकिन भने भएको छैन । उनी विमानमार्पmत काठमाडौं आउन सक्ने अनुमानका साथ अध्यागमन विभागले उनलाई कालो सूचीमा राखेको छ । प्रहरी पनि सोहीअनुसार सचेत भएको छ । तर, उनी नेपाल नफर्किए इन्टरपोलको सहयोगमा पक्राउ गरिने प्रहरीले बताउँदै आएको छ ।

त्रिभुवन अन्तर्राष्ट्रिय विमानस्थल सुरक्षा कार्यालयका अनुसार उनी जतिबेला पनि नेपाल आउन सक्ने हुँदा प्रहरीलाई ‘अलर्ट’ गरिएको छ । विमानस्थलबाटै नेपाल आउने सम्भावना उच्च भएकाले जिल्ला प्रहरी परिसर काठमाडौंको पत्राचारपछि उनलाई कालोसूचीमा राख्न भनिएको प्रहरी वरिष्ठ उपरीक्षक (एसएसपी) दिपेन्द्र घर्ती क्षेत्रीले बताएका छन् । यस्तै लामिछाने जुनसुकै स्थानबाट पनि नेपाल आउन सक्ने हुँदा प्रहरीले देशैभर पक्राउ गर्न पत्राचार गरेको छ ।

सन्दीप भदौ ६ गते केन्यामा हुने टी–२० खेलका लागि गएका थिए। त्यहाँबाट क्यारेबियन प्रिमियर लिग (सिपिएल) खेल्न उनी वेष्ट इन्डिज पुगेका थिए। गत शुक्रबार उनले सामाजिक संजाल मार्फत आफूले सिपिएल छाडेर केही दिनमै नेपाल आउने बताएका थिए। उनले आफूमाथि लागेको आरोपको सामना गर्ने र निर्दोष भएको बताएका छन् । यता जाहेरी परेसँगै सन्दीपविरुद्धका प्रमाण खोज्दै अनुशन्धानलाई निरन्तरता दिएको प्रहरीले जनाएको छ ।