१० असोज, काठमाण्डौ ।
आसन्न प्रतिनिधि सभाको निर्वाचन पछि आफूलाई प्रधानमन्त्रीको दाबेदारका रुपमा उभ्याउदै आएका नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ ले आफूलाई अहिले पनि प्रधानमन्त्रीको अफर रहेको दाबी गरेका छन् ।
उनले कहाँबाट त्यस्तो अफर आएको भने खुलाएका छैनन् । निर्वाचन क्षेत्र चितवन पुगेका प्रचण्डले प्रेस सेन्टरद्वारा आयोजित दशैँको शुभकामना कार्यक्रममा राजनीतिक स्थिरता लोकतन्त्र सुदृढीकरण र आर्थिक समृद्धि आफ्नो प्रतिबद्धता भएको बताएका छन् ।
‘चाहेको भए ७४ को चुनावपछि ५ वर्ष प्रधानमन्त्री हुने अफर थियो, अहिले पनि छ । म प्रधानमन्त्रीको रेसमा छैन । राजनीतिक स्थिरता लोकतन्त्र सुदृढीकरण आर्थिक समृद्धि मेरो प्रतिबद्धता हो फैसला तपाईँहरूको हातमा छ । शान्ति प्रक्रियामा गिरिजासँग सम्झौता गर्दै गर्दा मैले जनताको फैसला मान्छु भनेर गरेको हुँ ।’
अबको दशक आर्थिक क्रान्तिको दशक भएको भन्दै प्रचण्डले जीवनको उत्तरार्द्धमा अब त्यसमा लाग्ने बताए । चितवनलाई विकासको मोडलको रूपमा विकास गर्न चाहेको भन्दै उनले भने, ‘कसले के भन्छ भन्दा पनि कसले के गर्छ भन्नेले निर्णय गर्छ । भरतपुर महानगर र चितवनमा के भइरहेको छ भनेर यहाँको विकासले बोलिराखेको छ । देशको मध्यभागमा रहेको चितवनको विकासको मोडल देशभरका लागि सन्देश बन्नुपर्छ । यो चितवनको मात्र होइन राष्ट्रको सवाल हो । राष्ट्रिय अन्तर्राष्ट्रिय संघसंस्थासँग समन्वयमा छु । समृद्धिका लागि खरबौंको परियोजना कसरी ल्याउन सकिन्छ भनेर लागेको छु ।’
संविधान उल्ट्याउन, गणतन्त्र कमजोर पार्न र नेतालाई बदनाम गर्न एकथरी लागेका भन्दै प्रचण्डले त्यसका लागि सामाजिक सञ्जाललाई माध्यम बनाइएको बताए । पाँच दलीय गठबन्धनबाट आगामी प्रधानमन्त्री को हो भन्ने विषयमा निष्कर्ष ननिस्किएको अवस्थामा प्रचयडले आफू प्रधानमन्त्रीको रेसमा नभएको बताउनुले गठबन्धनभित्र प्रचण्डको विकल्पमा अन्य नेताहरुलाई अघि सार्ने समझदारी रहेको विश्लेषण गरिएको छ ।
यसअघि प्रचण्डले आफू निर्वाचनपछिको सरकारको प्रधानमन्त्रीको दाबेदार रहेको सार्वजनिक रुपमै अभिब्यक्ति दिएका थिए । केही दिन अघि मात्रै काग्रेस वरिष्ठ नेता रामचन्द्र पौडेलले आफूलाई देशको प्रधानमन्त्री बन्ने इच्छा रहेको बताउदै कांग्रेस सभापति तथा प्रधानमन्त्री शेरबहादुर देउवालेसमेत आवश्यकताको आधारमा वचन दिएको दावी गरेका थिए ।
