विराटनगर,भदौ ८
बिराटनगरको नोबेल शिक्षण अस्पतालले मुटुरोगको दुर्लभ मानिने उपचार सफलतापूर्वक गरेको छ । मुटुको अत्याधिक चाल बढेर उपचारका लागि नोबेल पुगेका मोरङ मधुमल्लाका पिआर आचार्यको छातिमा आईसीडी राखेर मुटुको चाल सामान्य बनाईएको हो ।
वेलावेला मुटुको चाल अत्याधिक बढेर बिरामीको ज्यानै जानसक्ने खतरा भएपछि मुटुको चाल नियन्त्रण गर्न बिषेश प्रकारको डिभाईस (आईसीडी) राख्ने गरिन्छ । जुन नेपालका बिरलै मात्र अस्पतालमा राखिने गरिएको चिकित्सकहरुको भनाई छ । मुटुको अत्याधिक चाल बढेपछि आचार्य उपचारका लागि नोबेल अस्पताल गएका थिए ।
आचार्यको छातीमा आईसीडी राखेर बिशेष तारको माध्यमबाट मुटुमा जोडी मुटुको अत्याधिक चाल कम गरिएको नोबेल अस्पतालका डा.सहदेव ढुंगानाले बताए । नोबेल अस्पतालमा पहिलो पटक आईसीडी राखिएको हो । नेपालका १, २ वटा अस्पतालमा मात्र यो उपचार हुने गरेको छ । मुटुको चाल बढ्ने संकेत पाउँने बित्तिकै उक्त डिभाईसले तत्काल काम गरेर मुटुलाई सामान्य चालमा फर्काउने गर्दछ । जसका कारण बिरामीलाई मुटुको चाल बढ्ने समस्या हुन नपाउँने र सोहि कारणबाट मृत्यु नहुँने चिकित्सकहरु बताउँछन् ।
