Nepal Times
Nepal Times
3
Shares

गण्डक बाँधका ३६ वटै ढोका खोलियो/ राप्ती नदीमा बाढीले नाघ्यो सतर्कता तह

गण्डक बाँधका ३६ वटै ढोका खोलियो/ राप्ती नदीमा बाढीले नाघ्यो सतर्कता तह

२० असोज, काठमाण्डौ ।
लगातार परेको वर्षाका कारण नारायणी नदीमा पानीको बहाव बढ्न थालेपछि त्रिवेणीस्थित गण्डक ब्यारेजका सबै ३६ वटै ढोका खोलिएको छ । रातिदेखिनै नारायणी नदीको जलसहत बढ्ने क्रममा रहेकाले हुनसक्ने जोखिमीलाई मध्यनजर गर्दै गण्डक ब्यारेजका सबै ढोका खोलिएको त्रिवेणीस्थित इलाका प्रहरी कार्यालयका प्रहरी नायब निरीक्षक रजिन रानाले जानकारी दिए ।

ब्यारेजमा पानीको बहाव उच्च भएपछि नेपाल र भारततर्फको सबै ढोका खोलिएको हो । नदीको सतह खतरा नजिक पुगेपछि बिहान ८ बजे २२ वटा ढोका खोलिएकोमा पानीको सतह बढ्दै गएपछि बिहान १० बजे ब्यारेजका ३६ वटा ढोका खोलिएको पूर्वी नवलपरासीका प्रमुख जिल्ला अधिकारी सुमन घिमिरेले बताए ।

बिहान १० बजे गण्डक ब्यारेजमा २ लाख ८६ हजार ८ सय क्युसेक पानीको बहाब छ । तटिय क्षेत्रका स्थानीयलाई सर्तक हुन र सुरक्षा निकायलाई तयारी अवस्थामा राखिएको प्रशासनले जनाएको छ । संरचना पुरानो भएकाले गण्डक ब्यारेजमा तीनलाख क्युसेक पानीको प्रवाहमा खतराको सूचक मानिन्छ ।

नारायणी नदीमा बाढीको कारण क्षति पुग्न सक्ने भन्दै पूर्वी र पश्चिम नवलपरासीमा सर्तकता अपनाउन प्रशासनले आग्रह गरेको छ । बाढी सूचना केन्द्रले नारायणी नदीको जलाधार क्षेत्रमा थप वर्षा हुने पूर्वानुमान गदैै नवलपरासी र चितवनका तटीय क्षेत्रमा हुने आज साँझसम्म सतर्कता साथ सुरक्षित स्थानमा रहन अनुरोध गरेको छ ।

यता बाँकेको राप्ती नदीमा आएको बाढीले सतर्कता तह नाघेको छ । बाँकेको कुसुमस्थित बाढी मापन केन्द्रले बुधबार बेलुका ७ बजेदेखि नै राप्ती नदीको जलस्तर ६ दशमलव ६२ मिटरभन्दा माथि पुगेको जनाएको छ ।

जिल्ला आपत्कालीन कार्य सञ्चालन केन्द्र बाँकेले राप्ती नदीमा पानीको सतह बढ्ने क्रम जारी रहेको सूचना जारी गरी नदी तटीय क्षेत्रका बासिन्दालाई सावधानी अपनाउन आग्रह गरेको छ । पानीको सतह ५.४० मिटर पुगेपछि डुबान हुने खतरा हुन्छ ।

राप्ती नदीमा पानीको सतह ५ मिटर ८ सेन्टिमिटर पुगेपछि खतरा मानिन्छ । राप्तीको तल्लो तटीय क्षेत्र फत्तेपुर, गंगापुर, होलिया, बेतहनी, कम्दीलगायत स्थानमा बाढी पस्न सक्ने भन्दै जिल्ला प्रशासन कार्यालय बाँकेले राप्तीको तल्लो तटीय क्षेत्रमा बस्ने सर्वसाधारणलाई सर्तकता अपाउन र दाउरा छोप्न नजानका लागि आग्रह गरेको छ ।

बाढी खतराको चिह्नभन्दा माथी पुगेपछि राप्तीको तल्लो तटीय क्षेत्रका स्थानीय बासिन्दालाई सुरक्षित स्थानमा जान अलर्ट गराइएको छ । राप्तीमा बाढी बढेपछि खतरा स्वरुप साइरनसमेत बजाइएको छ । लगातार भैरहेको वर्षासँगै खोलानदीमा आएको बाढीले दसैं मनाउन र टीका थाप्न टाढाटाढा जानेहरू प्रभावित भएका छन् । टी

का थाप्न हिँडेकाहरूमध्ये कतिपय खोलामा बाढी भएकाले बीच बाटोबाटै फर्किन बाध्य भएका छन् । वर्षापछि गएको पहिरोका कारण नारायणगढ–मुग्लिन सडक खण्ड अवरुद्ध भएको छ । भरतपुर महानगरपालिका–२९ सत्रकिलोमा लेदोसहितको पहिरो खसेको जिल्ला प्रहरी कार्यालयले जनाएको छ ।

कार्यालयका प्रवक्ता तथा प्रहरी नायब उपरीक्षक विजयराज पण्डितका अनुसार आज बिहान ८ः२० बजे लेदोसहितको पहिरो खसी सडक दुईतर्फी सडक अवरुद्ध भएको हो । सडक अवरुद्ध भएसँगै नारायणगढ–मुग्लिन सडक भएर चल्ने सवारी साधन र यात्रु बाटोमा अलपत्र परेका छन् । सडकमा खसेको पहिरो पन्छाउन सडक विभागसँग समन्वय भइरहेको कार्यालयले जनाएको छ ।
….

तपाईंको प्रतिक्रिया

© copyright 2024 and all right reserved to Nepal Times | Design & Develop By : InDesign Media Pvt. Ltd.