Nepal Times
Nepal Times
3
Shares

भीम रावललाई टिकट नदिएकोमा विरोधमा उत्रिए अछामका नेता

भीम रावललाई टिकट नदिएकोमा विरोधमा उत्रिए अछामका नेता

२२ असोज,काठमाण्डौ ।
नेकपा एमालेले पूर्वउपाध्यक्ष डा.भीम रावललाई टिकट नदिएको विरोधमा क्षेत्रीय कमिटी संयोजक प्रकाश शाहले राजीनामा दिएका छन् । शाहले पार्टी अध्यक्ष केपी शर्मा ओलीलाई पत्र लेख्दै पदबाट राजीनामा दिएको जानकारी गराएका छन् ।

एमाले अछाम जिल्ला इन्चार्ज झपट बोहराको प्रमुख आतिथ्यमा गत भदौ १९ गते बसेको निर्वाचन क्षेत्र समन्वय कमिटीको बैठकले क्षेत्र नम्बर १ मा सर्वसम्मत रुपमा भीम रावललाई प्रतिनिधि सभा सदस्यको उम्मेदवार बनाउन सिफारिस गरेको थियो । तर एमालेले रावललाई नभई जिल्ला इन्चार्ज बोहरालाई टिकट दिने निर्णय गरेपछि शाहले नैतिकताको आधारमा राजीनामा दिएका हुन् ।

उनले पत्रमा लेखेका छन्, ‘समन्वय कमिटीको सर्वसम्मत सिफारिस भन्दा अन्य निर्णय भएकाले समन्वय कमिटीको संयोजक पदमा बसीरहन मेरो नैतिकताले नमान्ने भएकाले आजैको मितिबाट क्षेत्रीय समन्वय कमिटीको संयोजक पदबाट राजीनामा दिएको जानकारी साथ अनुरोध छ ।’

सुदूरपश्चिम प्रदेश सरकारका पूर्व आर्थिक मामिलामन्त्री समेत रहेका अछाम १ मा टिकट पाएका बोहरा माओवादीबाट एमालेमा समाहित भएका नेता हुन् । रावलको टिकट खोसिएपछि उनको गृहजिल्लामा असन्तुष्टि तीव्र भएको छ । एमाले क्षेत्र नम्बर १ समन्वय समिति, प्रदेश समन्वय समिति, पालिका कमिटी तथा जिल्ला कमिटी सदस्यहरुले सामूहिक राजीनामा दिने तयारी गरेका छन् ।

१० औँ महाधिवेशनताका सर्वसम्मत अध्यक्ष बन्ने ओलीको चाहनामा रावलले धावा बोलेका थिए । त्यसपछि उनीहरु दुईबीचको सम्बन्ध बिग्रिएको छ । एमाले विभाजन हुँदा १० बुँदे सहमतिपछि माधवकुमार नेपालको साथ छोडेर रावल एमालेमै बसेका थिए । एमाले नेता रावलले अछामबाट वि.सं. २०४८ सालदेखि नै चुनाव लडिरहेका छन् ।

०४८ सालमा चुनाव हारेका रावल ०५१ सालको मध्यावधि चुनावमा अछाम १ बाट जितेका थिए । भीम रावल ०५६ सालको चुनावमा एमाले–माले फुटेको कारण फेरि चुनाव हारे । त्यसपछि ०६४ को चुनावमा उनी समानुपातिकतर्फ लागे । ०७० र ०७४ को चुनावमा रावल क्षेत्र नम्बर १ बाटै दुईचोटि सांसद बनेका थिए ।

रावलसंगै टिकट नपाएका अर्का नेता घनश्याम भुसालको क्षेत्रमा यसपटक एमालेले राप्रपालाई सघाउने भएको छ । एमाले अध्यक्ष केपी शर्मा ओलीले आफ्नो पार्टीका नेता भुसालको टिकट खोसेर पूर्वपञ्च दीपक बोहोरालाई सघाउने निर्णय गरेका छन् । राप्रपा अध्यक्ष राजेन्द्र लिङदेनसँग तीन सिटमा चुनावी तालमेल गर्ने क्रममा ओलीले भुसालको टिकट खोसेर राप्रपा नेता बोहोरालाई सघाउने निर्णय लिएका हुन् ।

झापा क्षेत्र नम्बर ३ मा राप्रपा अध्यक्ष लिङदेनलाई सघाएर क्षेत्र नम्बर ५ को भोट आफूले लिने र जित्ने रणनीति अन्तर्गत ओलीले राप्रपालाई उपयोग गर्ने नीति ०७४ सालदेखि नै लिँदै आएका छन् । यसक्रममा झापा ५ मा आफ्नो सिट सुरक्षित गर्दै ओलीले रुपन्देही ३ मा घनश्याम भुसालको सिट दाऊमा लगाइदिएका हुन् । ०७४ सालको प्रतिनिधिसभा निर्वाचनमा एमाले नेता घनश्याम भुसालले रुपन्देही ३ बाट राप्रपाका नेता दीपक बोहोरालाई संसदमा आउनबाट रोकेका थिए ।

भुसालले ३२ हजार ८६६ मत ल्याएर जित्दा बोहोराले २७ हजार ४२२ मत ल्याए र हारे । आसन्न निर्वाचनका लागि पनि एमालेका बैचारिक नेता भुसाललाई रुपन्देही ३ बाट कार्यकर्ताहरुले उम्मेदवार बनाउन केन्द्रमा सिफारिस पठाएका थिए । तर, स्थानीय पार्टीको निर्णय सुनुवाई नगरी केन्द्रले भुसालको ठाउँ राप्रपालाई छाडिदिने निर्णय गरेको हो ।

तपाईंको प्रतिक्रिया

© copyright 2024 and all right reserved to Nepal Times | Design & Develop By : InDesign Media Pvt. Ltd.