१२ असोज, काठमाण्डौ ।
हुम्लाको चंखेली गाउँपालिका–६ मा पहिरोले घर पुरिँदा एकै परिवारका ४ जनाको मृत्यु भएको छ । पहिरोमा पुरिएका अन्य ३ जना घाइतेको उद्धार गरिएको छ । लगातार परेको पानीले घरमाथि पहिरो जाँदा घर पुरिएको हो । मृत्यु हुने चारै जना बालबालिका हुन् । घटनास्थलमा प्रहरी पुगिनसकेकोले के कति क्षति भएको हो यकिन विवरण आइसकेको छैन ।
घटनास्थल पुग्न सदरमुकाम सिमकोटबाट ३ दिन हिँडेपछि मात्रै पुगिन्छ । स्थानीयका अनुसार घाइते ३ जनाको स्थानीय स्वास्थ्यचौकीमा उपचार भइरहेको छ । अहिले पनि झरी परिरहेकोले पुरिएकाको शव निकाल्न सकिएको छैन । यता कालिकोटमा पहिरोमा परेर २३ जना बेपत्ता भएका छन् ।
जिल्ला प्रहरी कार्यालयले तिलागुफा नगरपालिका, सानी त्रिवणी गाउँपालिका र पचालझरना गाउँपालिकाका लगायतका स्थानमा पहिरोमा परेर २३ जना बेपत्ता भएका हुन् । जिल्ला प्रहरी कार्यालय कालिकोटका अनुशार तिलागुफा नगरपालिका– ४ राँचुलीमा पहिरो जाँदा १५ जना बेपत्ता भएका छन् ।
मलामी गएका १५ जनानै सम्पर्कबिहीन भएका छन् । स्थानीयले पहिरोमा पुरिएको आशंका गरेका छन् । राँचुली गाउँमाथिबाट आएको पहिरोले स्थानीय विस्थापित भएका छन् । तिलागुफा नगरपालिका–७ बालिमा पहिरो जाँदा ६ जना, सानी त्रिवणी गाउँपालिका –९ मुन्द्रामा १ जना र पचालझरना गाउँपालिका–७ मा १ जना गरी २३ जना बेपत्ता भएका हुन् ।
उनीहरुको खोजीकार्यका लागि स्थानीय र प्रहरी जुटेको छ । प्रहरीले अन्य स्थानमा पनि पहिरो गएकाले बेपत्ता हुनेको संख्या बढ्न सक्ने बताएको छ । यता लगातारको वर्षापछि कर्णाली नदीमा आएको बाढीले ८ सयभन्दा बढी परिवार विस्थापित भएका छन् । घर छाडेर जानेको संख्या पनि बढिरहेको राजापुर नगरपालिकाले जनाएको छ ।
बाढीले कर्णालीको जलसतह पार गर्दै राजापुर नगरपालिका र गेरुवा गाउँपालिकाको–८ सय घर डुबानमा पारेको छ । डुबानमा परेकालाई सुरक्षित स्थानमा स्थानान्तरण गरिएको राजापुर नगरपालिकाका प्रमुख दिपेश चौधरीले बताए । पहाडी र तराई क्षेत्रमा वर्षात नरोकिएकोले तटीय क्षेत्रका बासिन्दालाई उच्च सतर्कतामा रहन स्थानीय प्रशासनले आग्रह गरेको छ ।
कर्णालीको बाढी कैलालीको टिकापुर क्षेत्रमा पसेको प्रहरीले जनाएको छ । आज पनि लुम्बिनी, कर्णाली र सुदूरपश्चिम प्रदेशमा ठूलो पानी पर्ने सम्भावना रहेको मौसमविद्ले बताएका छन् । मौसमविद् सञ्जीव अधिकारीका अनुसार अहिले पनि यी तीन प्रदेशका केही ठाउँमा ठूलो पानी परिरहेको छ ।
यस्तै, अन्य प्रदेशमा भने आज हल्कादेखि मध्यम वर्षाको सम्भावना रहेको मौसमविद्ले बताएका छन् । भोलिदेखि भने पानी पर्ने क्रम बिस्तारै कम हुने अनुमान गरिएको छ । तर, मनसुन सक्रिय नै रहेकाले हल्कादेखि मध्यम वर्षा भने हुने मौसम विभागले जनाएको छ । गएको अक्टोबर २ अर्थात १६ गते नै मनसुन सकिनु पर्नेमा यसपालि मनसुन लम्बिएको छ ।
