Nepal Times
Nepal Times
9
Shares

बालेनलाई ओलीको प्रश्न, सुकुम्बासी बस्तीमा किन तमासा गरेको ?

बालेनलाई ओलीको प्रश्न, सुकुम्बासी बस्तीमा किन तमासा गरेको ?

१३ मंसिर,काठमाण्डौ ।
आम निर्वाचनको अन्तिममत परिणाम आउँदै गर्दा निर्वाचनपछि पहिलो पटक सार्वजनिक समारोहमा लामो मन्तब्य राखेका नेकपा एमालेका अध्यक्ष केपी शर्मा ओलीले राष्ट्रिय स्वतन्त्र पार्टीको उदय रहस्यमय रहेको भन्दै आशंका जनाएका छन् ।

पार्टी गठनको छोटो समयमै सहभागिता जनाएको प्रतिनिधि सभाको निर्वाचनमा उत्साहजनक नतिजा निकालेको रवि लामिछाने नेतृत्वको रास्वपालाई ओलीले एउटा अमेरिकी पार्टीको फोटोकपी भएको टिप्पणी गरेका छन् । मंगलबार नवनिर्वाचित एमालेका सांसदहरुलाई सम्वोधन गर्दै ओलीले अमेरिकामा रहेको पार्टीको दुरुस्तै नेपालमा पनि कसरी भयो भन्दै प्रश्न गरेका छन् ।

उनले भने–‘संयोग नै भनौँ अमेरिकामा एउटा फ्रिडम पार्टी भन्ने छ । त्यसको चिन्ह घण्टी छ । फ्रिडम पार्टी अफ अमेरिका, त्यसको चिन्ह घण्टी छ । दुरुस्त आकारको, फोटो खिचेजस्तो दुरुस्त आकारको घण्टी चिन्ह यहाँपनि ल्याएको छ । फ्रिडम पार्टी भनेको छ, संयोग नै होला । अस्तिसम्म स्याप्पै थियो त्यो पार्टी, हावा नहाली कसरी हुप्प भयो ? केही त होला ।’

उनले यसबारे थप टिप्पणी गर्ने पक्षमा आफू नरहेको समेत उल्लेख गरे । आम निर्वाचनबाट रवि लामिछाने नेतृत्वको सो पार्टी उदाएको छ । सो पार्टीले प्रतिनिधिसभामा ७ सिट जितेको छ भने समानुपातिकमा पनि उल्लेख्य मतसहित राष्ट्रिय दल बन्ने पक्का भइसकेको छ ।

यस्तै ओलीले बागमती किनारामा रहेका सुकुम्बासी हटाउनका लागि काठमाडौं महानगरपालिकाले थालेको अभियानको पनि आलोचना गरेका छन् । काठमाडौं महानगरपालिकाका मेयर बालेन साहको नाम नलिए पनि उनलाई लक्षित गर्दै ओलीले आलोचना गरेका छन् । उनले सुकुम्बासी बस्तीमा तमासा भएको टिप्पणी गरेका छन् ।

उनले भने, ‘तपाईंहरुले हिजो देखिहाल्नुभयो, सुकुम्बासी बस्तीको तमासा र उनीहरुलाई हटाउने हाकिमका कुरा सुनी हाल्नुभयो, प्रहरीले, सरकारले सहयोग गरेन, सहयोग गरेको भए हामी उनीहरुलाई पराजित गर्थ्यौ,’ ओलीले भने, ‘त्यो के गरेको, उन्मादले समस्या समाधान हुँदैन ।’

काठमाडौं महानगरका नगरप्रहरी प्रमुखले सुकुम्बासी बस्ती हटाउन सरकारले सहयोग नगरेको गुनासो गरेका थिए । ओलीले फुसका छाप्रा भत्काउन डोजर लगिएको भन्दै व्यंग्य पनि गरे । भने, ‘छाप्रा भत्काउन पनि डोजर, मान्छे कुल्चिन डोजर ।’

तपाईंको प्रतिक्रिया

© copyright 2024 and all right reserved to Nepal Times | Design & Develop By : InDesign Media Pvt. Ltd.