२० मंसिर,एजेन्सी ।
राज्यविहीन अवस्थामा पुगेको हाइटीमा सशस्त्र गुण्डाहरूको प्रभावका कारण प्रधानमन्त्रीसमेत कार्यालय जान नसक्ने अवस्था आएको छ । पछिल्ला राष्ट्रपतिलाई कार्यालयमै गोली हानेर हत्या गरेपछि अहिले हाइटीमा संसद् छैन । अमेरिकाले समर्थन गरेका प्रधानमन्त्री आरियल अनरीले राज्य चलाउन सकिरहेका छैनन् ।
अनरीलाई धेरैले प्रधानमन्त्री नै नमान्ने गरेको बीबीसीले जनाएको छ । राज्यविहीन अवस्थामा पुगेको हाइटीको आधा जनसङ्ख्या अर्थात् झन्डै ४७ लाख मानिस भोकमरीको चपेटामा रहेका संयुक्त राष्ट्र सङ्घले जनाएको छ । अहिले सशस्त्र गुन्डाहरूले देशका विभिन्न क्षेत्र कब्जा गरेका छन् । हाइटी दशकौंदेखि प्राकृतिक प्रकोप र राजनीतिक उथलपुथलले ग्रस्त छ।
गत वर्ष, राष्ट्रपति जोभेनेल मोइसको हत्या भयो र अर्को घातक भूकम्पले देशलाई अराजकतामा फ्याँक्यो । हालका महिनाहरूमा संकट मात्र गहिरो भएको छ। गिरोहहरूले देशका विभिन्न भागहरूमा नागरिक र विदेशीहरूलाई अपहरण गर्दै र ताजा पानी र खाद्यान्न जस्ता महत्वपूर्ण आपूर्तिहरूको प्रवाह रोक्न नाकाबन्दी लगाएका छन्।
नयाँ हैजाको प्रकोपले सयौंको ज्यान लिएको छ किनभने अस्पतालहरूले आधारभूत सेवाहरू उपलब्ध गराउन संघर्ष गरिरहेका छन । सशस्त्र समूहले कब्जा गरेको एउटा क्षेत्रका मानिस अर्को क्षेत्रमा पुगे भने हत्यासमेत हुने गरेको छ । सशस्त्र समूहले अपहरण, बलात्कार तथा हत्याका शृङ्खला मच्चाइरहेका छन् ।
संयुक्त राष्ट्र सङ्घका अनुसार बितेको १० महिनामा अपहरणका एक हजार एक सय सात वटा घटना भएका छन् । सामूहिक बलात्कारका घटना सामान्यजस्ता बन्न थालेका छन् । मानिसहरू रात परेपछि घरबाहिर निस्कनै सक्दैनन् । संसद्को वरपरको क्षेत्र तथा राजधानी भित्रिने र बाहिरिने सडक सशस्त्र समूहको पूर्ण नियन्त्रणमा रहेको छ । राजधानी पोर्टो प्रिन्समा जथाभाबी फोहर थुप्रिएको छ ।
