२० मंसिर, एजेन्सी ।
पछिल्ला दिनहरुमा रुसले युक्रेनमा आक्रमणहरु थप चर्काउने र अबका आक्रमणहरु झनै घातक हुने विभिन्न आशंका, टिकाटिप्पणी भइरहेका बेला रुसले यसलाई सत्य सावित गर्न थालेको छ । रुसले युक्रेनमा पछिल्लो पटक क्षेप्यास्त्रहरुको वर्षा गरिरहेको छ । रुसले आठ साताको बीचमा युक्रेनमा आठौँ पटक क्षेप्यास्त्रको वर्षा गरेको छ ।
रुसी आक्रमणका कारण पूर्वी क्षेत्रमा विद्युत् आपूर्ति प्रभावित भएको विवरण आएका छन् । दक्षिण युक्रेनको ओडेसामा पनि विद्युत् कटौती भएको छ । आक्रमणमा चार जना मारिएको युक्रेनले जनाएको छ । दुई हप्ताको अन्तरालपछि गरिएको मिसाइल आक्रमणमा पछिल्ला आक्रमणका तुलनामा कम क्षति भएको युक्रेनको दाबी छ ।
रुसले प्रहार गरेका ७० मध्ये ६० वटा मिसाइललाई आकाशमा नै नष्ट गरिएको युक्रेनले बताएको छ । उता, मस्कोले भने सबै १७ वटा लक्ष्यमा सफलतापूर्वक मिसाइल प्रहार भएको जानकारी दिएको छ । रुसका दुई सैन्य हवाई क्षेत्रमा विस्फोट भएको केही घण्टामा नै रुसले जवाफी कारबाही सुरु गरेको थियो । रुसले यसमा युक्रेनी ड्रोन संलग्न रहेको दाबी गरेको छ ।
रुसले गत अक्टोबर १० देखि युक्रेनको विद्युतीय ग्रिडलाई निशाना बनाएर आक्रमण गर्दै आएको छ । त्यसयता युक्रेनको आधाभन्दा बढी विद्युतीय संरचनामा क्षति पुगेको बताइएको छ । यसले शून्यभन्दा तल पुग्ने तापक्रममा लाखौँ युक्रेनी नागरिक बाँच्न बाध्य बनेका छन् ।
युक्रेनी राष्ट्रपति भोलोदिमिर जेलेन्सकीले रुसी आक्रमण युक्रेनका लागि मात्रै नभएर पूरै क्षेत्रका लागि चेतावनी भएको बताएका छन् । यसअघिका आक्रमणहरूमा पनि युक्रेनको ऊर्जा प्रणालीमा प्रहार भएको थियो जसका कारण दशौँ लाख मानिसहरू बिजुली र जाडो सुरु हुनै लाग्दा न्यानोबाट वञ्चित भएका थिए । राजधानी किभसहित कैयौँ क्षेत्रमा हवाई आक्रमण हुनसक्ने चेतावनीयुक्त साइरन बजेका छन् ।
यसैबीच पश्चिमा देशहरूले उसको तेल निर्यातबाट हुने आम्दानी कटौती गर्न चालेका कदमप्रति रुसले अवज्ञापूर्ण प्रतिक्रिया जनाएको छ । ती कदमले युक्रेनमा युद्ध गर्ने आफ्नो क्षमतामा किञ्चित फरक नपर्ने क्रेम्लिनले बताएको छ ।
युरोपेली सङ्घले अबदेखि समुद्री मार्गबाट रुसी तेल आयात नगर्ने जनाएको छ । साथै उसले अन्यत्र हुने तेल निर्यातमा पनि बन्देजहरू लगाएको छ । प्रति ब्यारेल मूल्य ६० डलरभन्दा कम्ती नभएको खण्डमा ईयू सदस्य राष्ट्र तथा जापान, अस्ट्रेलिया, यूके र अमेरिकाका कार्गो तथा बिमा कम्पनीहरूलाई रुसी तेल ओसारपसारमा संलग्न हुन अनुमति नदिने उसले बताएको छ ।
