२८ पौष,काठमाण्डौ ।
बाँकेमा पछिल्लो २४ घण्टामा ५ जना दादुराका बिरामी थपिएका छन् । जिल्लाको नेपालगञ्ज उपमहानगरपालिकामा दुई सातायता ११५ जना बालबालिकामा दादु्रा संक्रमण देखिएको जिल्ला स्वास्थ्य कार्यालय बाँकेले जनाएको छ । दादुराकै कारण ३१ महिने बच्चाको मृत्यु भएको छ ।
नेपालगञ्जका ११३ र खजुराका २ जनागरी ११५ जनामा दादुरा पुष्टि भएको स्वास्थ्य कार्यालय बाँकेले जनाएको छ । दादुरा भएकामध्ये दुई जनाको अस्पतालमा उपचार भैरहेको छ भने ५८ जनालाई होम आइसोलेसनमा राखिएको छ । अस्पताल र होम आइसोलेसनमा राखिएकासहित ६२ जना उपचाररत रहेको खोप सुपरभाइजर नरेश श्रेष्ठले जानकारी दिए ।
दादुराका बिरामी बढ्न थालेपछि खोप अभियान सञ्चालन गरिएको छ । आज बिहान १० बजेदेखि साँझ ४ बजेसम्म १५ वटा खोप केन्द्रमा खोप अभियान सञ्चालन गरिएको खोप सुपरभाइजर श्रेष्ठले बताए । उनका अनुसार ८ वटा वडामा खोप कार्यक्रम सञ्चालन गरिएको हो ।
नेपालगञ्ज उपमहानगरपालिकाका १, ४, ५, ८, ११, १४ र १५ नम्बर वडामा दुई दुईवटा खोप केन्द्र सञ्चालन गरिएको छ भने ७ मा एउटा खोप केन्द्र सञ्चालन गरिएको स्वास्थ्य कार्यालय बाँकेले जानकारी दिएको छ । पुस २२ गतेदेखि २७ गतेसम्म ७ हजार १६३ जनाले खोप लिएका छन् । जिल्लामा ७ हजार मात्रा दादुरा–रुबेला खोप भण्डार रहेको सुपरभाइजर श्रेष्ठले बताए ।
यस्तै आज प्रदेश स्वास्थ्य आपूर्ति व्यवस्थापन केन्द्रबाट ३० हजार मात्रा दादुरा रुबेला खोप आइपुग्ने उनले बताए । उता नेपालगञ्ज उपहानगरपालिकाले दादुरा तथा रुबेला रोगको महामारी फैलन सक्ने सम्भावना देखिएको भन्दै दुई दिनकालागि सार्वजनिक विदा घोषणा गरेको छ ।
पुस २८ र २९ गते उपमहानगरपालिकाभित्र सञ्चालित सामुदायिक तथा धार्मिक विद्यालयहरुमा पूर्व निर्धारित परीक्षालाई असर नपर्ने गरी सूचना प्रकाशित गरिएको उपसचिव गोर्खबहादुर थापाद्वाारा जारी सूचनामा उल्लेख गरिएको छ ।
