३० पौष,एजेन्सी ।
विश्वकप २०२२ को विजेता अर्जेन्टिनाले कतारमा भएको फाइनल खेलका क्रममा गरेको ‘अपमानजनक व्यवहार’ र ‘फेयर प्ले उल्लंघन’ को आरोपमा अनुशासनात्मक कारबाही भोग्ने विश्व फुटबलको सर्वाेच्च निकाय (फिफा)ले जनाएको छ । उनीहरूलाई सम्भावित ‘खेलाडी र अधिकारीहरूको दुर्व्यहार’ गरिएको पनि उद्धृत गर्दै अन्तराष्ट्रिय सञ्चारमाध्यमहरुले उल्लेख गरेका छन् ।
यस्तै अर्जेन्टिना फुटबल एसोसिएसन (एफए)लाई प्रतियोगिताको क्रममा मिडिया र मार्केटिङ नियमहरू उल्लङ्घको आरोप लगाइएको छ । फाइनलमा फ्रान्सलाई टाइब्रेकरमा ४–२ ले पराजित गर्दै अर्जेन्टिना सन् १९८६ पछि पहिलोपटक विश्व च्याम्पियन बनेको हो ।
देशको प्रशिक्षण टोलीका कुन खेलाडी वा सदस्यहरूलाई अपराध गरेको अभियोग लगाइएको छ वा ती अपराधहरूबारे स्पष्ट उल्लेख गरिएको छैन । इंग्लिस क्लब एस्टन भिल्लाका गोलरक्षक एमिलियानो मार्टिनेजले खेलपछि आफ्नो गोलकिपर अफ द टूर्नामेंट ट्रफीसँग अभद्र व्यवहार गरेका थिए ।
ड्रेसिङ रुममा फ्रान्सका स्टार केलियन एमबाप्पेको समेत खिल्ली उडाएको तस्विर सार्वजनिक भएको थियो । फिफाले आफ्नो अनुशासनसंहिताको तीन सम्भावित उल्लङ्घनहरू पुष्टि गरेको छ । अनुच्छेद ११, जसले आपत्तिजनक व्यवहार र निष्पक्ष खेलका सिद्धान्तहरूको उल्लङ्घनलाई समेट्छ, धारा १२, जसले खेलाडी र अधिकारीहरूको दुर्व्यवहारलाई समेट्छ र धारा ४४ जसले मार्केटिङ नियमहरू समावेश गर्दछ।
सेमिफाइनलमा अर्जेन्टिनासँग पराजित भएको क्रोएसियामाथि भेदभावका साथै खेलमा व्यवस्था र सुरक्षाको सम्भावित उल्लंघनको पनि अनुसन्धान भइरहेको छ । यसैबीच, मेक्सिको र इक्वेडरलाई पनि विश्वकपमा समर्थकहरूले नारा लगाएकोमा सजाय दिइएको छ । मेक्सिकोलाई ८८ हजार पाउन्ड जरिवाना र बन्द रंगशालामा घरेलु लिग खेल्न आदेश दिइएको छ ।
यस्तै इक्वेडरलाई १७ हजार ६५० पाउन्ड जरिवाना र रंगशाला आंशिक रुपमा बन्द गरि खेलाउन आदेश दिइएको छ । त्यसैगरी, समूह ‘जी’ मा स्वीट्जरल्यान्डसँग ३–२ को हारपछि सर्वियन समर्थकले आफ्नो टोली र विपक्षी टोलीलाई दुर्व्यवहार गरेको आरोपमा सर्बियालाई ४४ हजार पाउन्ड जरिवानासँगै अब हुने अन्तर्राष्ट्रिय खेलका लागि रंगशाला आंशिक रुपमा बन्द गरिने भएको छ ।
