१२ माघ, एजेन्सी ।
फेसबुक र इन्स्टाग्रामको माउ कम्पनी मेटाले अमेरिकी पूर्व राष्ट्रपति डोनाल्ड ट्रम्पको निलम्बन फुकुवा गर्ने घोषणा गरेको छ । यो घोषणासँगै ट्रम्प फेसबुक र इन्स्टाग्राममा फर्किन पाउने भएका हुन् । मेटाका अनुसार दुई वर्ष अगाडि गरिएको निलम्बन आउँदो हप्ता समाप्त हुनेछ ।
सन् २०२१ मा अमेरिकी संसद् भवन क्यापिटलमा दङ्गा भएपछि ट्रम्पलाई फेसबुक र इन्स्टाग्रामबाट अनिश्चितकालका लागि निलम्बन गरिएको थियो । निलम्बन फुकुवा गर्दै मेटाका उच्च अधिकारी निक क्लेगले नागरिकले उनीहरुका राजनीतिज्ञहरूले के भनिरहेका छन् भन्ने जान्न पाउनुपर्ने जनाएका छन् ।
यस्तै ट्रम्पको सामाजिक सञ्जाल खाताको समीक्षा गर्दा त्यसले अब सार्वजनिक सुरक्षामा गम्भीर जोखिम नपर्ने देखिएको पनि क्लेगले बताएका छन् । तर ट्रम्पले विगतमा गरेका गल्ती पुनः गरेमा थप कारबाही हुनसक्ने जनाएको छ ।
नियम उल्लङ्घन गरेको भन्दै ट्विटरले पनि ट्रम्पलाई सन् २०२१ को जनवरी ६ तारिखमा भएको घटनापछि प्रतिबन्ध लगाएको थियो । तर गएको नोभेम्बरमा ट्विटरमा लगानीकर्ता इलोन मस्कले ट्रम्पको खातामा लगाइएको रोक हटाइएको बताएका थिए ।
तर ट्रम्प अहिलेसम्म ट्विटरमा फर्किएका छैनन् । ट्रम्पले पुनः राष्ट्रपति पदको प्रतिस्पर्धामा सहभागी हुने तयारी गरिरहेका छन् । उनलाई फेसबुकमा फिर्ता हुने बाटो खोलिदिन रिपब्लिकनहरूले दबाव दिइरहेका थिए । आफू प्रतिबन्धमा परेपछि ट्रम्पले आफ्नै सामाजिक सञ्जाल ट्रूथ खोलेका छन् ।
बुधवार उनले त्यसमा फेसबुकले “तपाईँको मन पर्ने राष्ट्रपति मलाई प्रतिबन्ध लगाएपछि अर्बौँ गुमायो“ लेखेका थिए । तर फेसबुक जस्तो ट्रम्पको ट्रूथले लोकप्रियता भने हासिल गर्न सकेको छैन् ।
