२ फागुन, एजेन्सी ।
राष्टिय क्रिकेट टालीका कप्तान रोहित पौडेलले एक दिवसीय खेलमा १ हजार रन पूरा गर्ने पहिलो नेपाली खेलाडी बनेका छन् । कीर्तिपुरस्थित त्रिवि क्रिकेट मैदानमा नामिबियाविरुद्धको खेलमा ५५ रन बनाएपछि रोहित १ हजार रन पुरा गर्ने पहिलो खेलाडी बनेका हुन् ।
रोहितले २६ ओभरको पहिलो बलमा चौका हान्दै एक दिवसीय क्रिकेटमा १ हजार रन पुरा गरेका छन् । रोहितले सन् २०१८ मा नेदरल्यान्डसँग खेल्दै राष्टिय टोलीमा डेब्यु गरेका थिए । गत वर्ष रोहित नेपालको उपकप्तान बनेका थिए ।
भदौमा सन्दीप लामिछानेलाई बलात्कारको आरोप लागेपछि रोहित नेपालको कप्तान बनेका थिए । एक दिवसीय खेलमा रोहितले ५ अर्धशतक र १ शतक हानेका छन् । एक दिवसीयमा ३३ खेल खेल्ने क्रममा रोहितले यो कोशेढुङगा पार गरेका हुन् ।
रोहितपछि ज्ञानेन्द्र मल्लले ओडिआईमा २७ खेलमा ६ अर्धशतकसहित ७ सय ३४ रन बनाएका छन् । आसिफ शेखले २४ खेलमा ५ अर्धशतकसहित ६ सय ५५ रन बनाएका छन् । आरिफ शेखले ३२ खेलमा ४ मा अर्धशतकसहित ५ सय ८२ रन बनाएका छन् । टि२० आईमा नेपालबाट एक हजार रन पूरा गर्ने पहिलो खेलाडी दीपेन्द्रसिंह ऐरी हुन् ।
दीपेन्द्रले ४४ टि२० आई खेलमा १ हजार १ सय ३ रन बनाएका छन् । नेपालका लागि एकै खेलमा सर्वाधिक रन बनाउने खेलाडी पनि उनी नै हुन् । उनले एउटै खेलमा सर्वाधिक १ सय २६ रन बनाएका छन् ।
रोहितले कीर्तिपुरस्थित त्रिवि क्रिकेट मैदानमा गत वर्ष पपुवान्यूगिनीविरुद्धको खेलमा ७ चौका र ४ छक्काको मद्दतमा १ सय २६ रन बनाएका थिए। नेपालका लागि शतक प्रहार गर्ने भने उनी तेस्रो खेलाडी हुन् । पूर्वक्रिकेटर पारस खड्काले १ सय १५ रनसहित शतक तथा दिपेन्द्र सिंह ऐरीले १ सय ५ रनसहित शतक बनाएका छन्।
